"लोकांना वाटतं माझ्याकडे गाड्या नाहीत", 'वाईट वेळ सुरू झाली' म्हणणाऱ्यांना गोविंदाच सणसणीत उत्तर, 'त्या' VIDEOचं सत्य समोर आणलं

९० च्या दशकातील बॉक्स ऑफिसचा राजा आणि आपल्या डान्सने अख्ख्या जगाला वेड लावणारा गोविंदा सध्या पुन्हा एकदा चर्चेच्या केंद्रस्थानी आला आहे. पण ही चर्चा त्याच्या एखाद्या आगामी चित्रपटाची नसून, सोशल मीडियावर व्हायरल झालेल्या एका व्हिडिओची आहे.

उत्तर प्रदेशातील एका शालेय कार्यक्रमात डान्स करतानाचा गोविंदाचा व्हिडिओ पाहून काहींनी त्याचं कौतुक केलं, तर काहींनी "एवढ्या मोठ्या सुपरस्टारवर ही काय वेळ आली?" अशा शब्दांत त्याला हिणवलं.

या सर्व चर्चांवर आणि ट्रोलिंगवर आता स्वतः गोविंदाने मौन सोडलं असून टीकाकारांना सडेतोड उत्तर दिलं आहे. नुकत्याच दिलेल्या एका मुलाखतीत गोविंदाने स्पष्ट केलं की, ज्या कार्यक्रमाला लोक किरकोळ कार्यक्रम समजत आहेत, त्याचं गांभीर्य काही वेगळंच होतं.

गोविंदा म्हणाला, "सोशल मीडियावर तथ्य न तपासता काहीही हेडलाईन्स चालवल्या जातात. ज्याला लोक छोटा शो म्हणत आहेत, त्यातील एक कार्यक्रम स्वतः मुख्यमंत्र्यांचा होता आणि दुसरा एका खासदाराचा होता. अशा सन्माननीय व्यक्तींच्या आमंत्रणाला मान देऊन तिथे जाणं, हा माझा मोठेपणा आहे, माझा डाऊनफॉल नाही."

आग्रा दौऱ्यात गोविंदा साध्या आणि स्वस्त गाड्यांमधून प्रवास करताना दिसला होता, ज्यामुळे त्याच्या आर्थिक स्थितीवर प्रश्नचिन्ह उपस्थित झाले. यावर हसत गोविंदाने उत्तर दिलं, "लोकांना वाटतं माझ्याकडे गाड्या नाहीत, पण सत्य हे आहे की तिथल्या प्रोटोकॉलनुसार आलिशान मर्सिडीज गाड्यांना आत जाण्याची परवानगी नसते. सुरक्षा नियमांमुळे आम्हाला तिथल्या स्थानिक गाड्यांचाच वापर करावा लागला. कामासाठी मी कधीही इगो आड आणत नाही. काम हे काम असतं, मग ते साध्या गाडीतून असो किंवा विमानातून."

जेव्हा सोशल मीडियावर गोविंदाच्या वाईट दिवसांची चर्चा सुरू होती, तेव्हाची एक आठवण त्याने सांगितली. तो म्हणाला, "मी जेव्हा विमानातून प्रवास करत होतो, तेव्हा सहप्रवाशांनी माझं गाणं गाऊन माझं स्वागत केलं. मला देवाने आणि माझ्या चाहत्यांनी इतकं काही दिलं आहे की, मी सदैव त्यांचा ऋणी राहीन. मला कोणासमोरही सिद्ध करायची गरज नाही की मी किती सुखी आहे."

गोविंदाच्या मॅनेजरनेही यापूर्वी स्पष्ट केलं होतं की, गोविंदाने कोणाकडूनही मदत मागितलेली नाही आणि तो आपल्या क्षेत्रात आजही सक्रिय आहे.