मामा राहिला बाजूला भाच्याने लावला नंबर! सलमान खानच्या घरात लगीनघाई, अयानने गुपचूप उरकला साखरपुडा, PHOTO VIRAL

मुंबई: नवीन वर्षाच्या सुरुवातीलाच बॉलिवूडच्या 'गॅलेक्सी' अपार्टमेंटमधून आनंदाची बातमी समोर आली आहे. सुपरस्टार सलमान खानचा लाडका भाचा आणि अतुल-अलविरा अग्निहोत्री यांचा मुलगा अयान अग्निहोत्री याने आपल्या आयुष्यातील नवीन प्रवासाची घोषणा केली आहे.

अयानने आपली गर्लफ्रेंड टीना रिजवानी हिच्यासोबत साखरपुडा केला असून, या सोहळ्याचे अतिशय सुंदर आणि रोमँटिक फोटो सध्या सोशल मीडियावर धुमाकूळ घालत आहेत.

अयानने आपल्या अधिकृत इंस्टाग्राम हँडलवरून या गोड बातमीवर शिक्कामोर्तब केलं. या प्रोपोजलचा थाटच काही और होता!

एका सुंदर स्विमिंग पूलच्या काठी, जिथे गुलाबाच्या पाकळ्यांचा सडा पडला होता, तिथे अयानने गुडघ्यावर बसून टीनाला मागणी घातली. आकाशात फटाक्यांची रोषणाई सुरू असताना टीनाचा होकार अयानने कॅमेऱ्यात कैद केली.

अयानने या फोटोंना एक जबरदस्त हटके कॅप्शन दिलं आहे. तो म्हणतो, "माझ्या गर्लफ्रेंडला मी २०२५ मध्येच मागे सोडतोय..." याचा अर्थ आता टीना त्याची केवळ गर्लफ्रेंड राहिली नसून ती त्याची होणारी बायको झाली आहे. अयानने टीनाच्या कपाळावर घेतलेल्या पापाचा फोटो पाहून चाहत्यांनी त्यावर प्रेमाचा वर्षाव केला आहे.

खान कुटुंबातील या आनंदाच्या प्रसंगी बॉलिवूडकरांनी कमेंट्स सेक्शनमध्ये एकच गर्दी केली. विशेष म्हणजे मलाइका अरोरा हिने "यानी आणि टीना" असं म्हणत हार्ट इमोजीसह दोघांचे अभिनंदन केले आहे.

अभिनेत्री सोनाक्षी सिन्हाने "ओ माय गॉड, मी तर खूप आनंदी आहे" अशी प्रतिक्रिया दिली, तर झहीर इक्बाल आणि अमृता अरोरा यांनीही या जोडप्यावर शुभेच्छांचा वर्षाव केला.

सलमान खानचा भाचा असल्यामुळे अयानवर सर्वांच्या नजरा असतातच, पण त्याने स्वतःची वेगळी ओळख निर्माण केली आहे. अयानला संगीत विश्वात 'अग्नी' या नावाने ओळखलं जातं.

अयान एक उत्तम गायक आणि संगीतकार आहे. २० फेब्रुवारी २०२५ रोजी त्याचं 'युनिव्हर्सल लॉज' (Universal Laws) हे गाणं गाजलं होतं. अयानने आपला मामा सलमान खानसोबत 'यू आर माइन' या गाण्यासाठी एकत्र काम केलं होतं, ज्याला विशाल मिश्राने संगीत दिलं होतं.

अलविरा खान आणि अतुल अग्निहोत्री यांचा मुलगा असलेल्या अयानने लहानपणापासून स्वतःला लाईमलाईटपासून दूर ठेवलं होतं. मात्र, आता त्याच्या व्यावसायिक आणि वैयक्तिक आयुष्यातील महत्त्वाच्या टप्प्यामुळे तो चर्चेत आला आहे. त्याची बहीण अलिझेह अग्निहोत्री हिनेदेखील 'फर्रे' चित्रपटातून अभिनयात पदार्पण केलं आहे.