Wheat Allergy : गहू सर्वांसाठी सुरक्षित नाही! गव्हाचे पीठ खाल्ल्यानंतर त्रास का होतो? डॉक्टरांचा महत्त्वाचा इशारा

पूर्वी लोक गहू, बाजरी, मका यांसारख्या धान्यांचे पीठ वापरत असत. काळानुसार बाजरी, मका आणि इतर धान्यांचा वापर कमी होत गेला आणि गव्हाचे उत्पादन वाढले. आजच्या काळात जवळपास प्रत्येक घरात गव्हाचे पीठ वापरले जाते. चपाती, पराठे, ब्रेड तसेच अनेक बेकरी पदार्थ गव्हाच्या पिठापासूनच तयार होतात.

अनेक बिस्किटे आणि बेकरी उत्पादनेही गव्हाच्या पिठापासून बनवली जातात. मात्र, काही लोकांसाठी गव्हाचे पीठ हानिकारक ठरू शकते हे तुम्हाला माहीत आहे का? गव्हाचे पीठ खाल्ल्यानंतर काही लोकांना पोटदुखी, गॅस, थकवा किंवा वारंवार आजारी पडण्याच्या तक्रारी होतात. अशा वेळी गव्हाचे पीठ खाल्ल्यानंतर त्रास का होतो आणि कोणी विशेष काळजी घ्यावी, हे समजून घेणे आवश्यक आहे.

नवी दिल्लीतील सर गंगाराम रुग्णालयाच्या प्रिव्हेंटिव्ह हेल्थ अँड वेलनेस विभागाच्या संचालक डॉ. सोनिया रावत यांनी News18 ला सांगितले की सिलीअॅक डिसीज ही गव्हाशी संबंधित सर्वात सामान्य समस्या आहे. हा एक ऑटोइम्यून आजार असून यात शरीर गव्हामध्ये असलेल्या ग्लूटेन प्रोटीनचे पचन करू शकत नाही. सिलीअॅक डिसीज असलेली व्यक्ती गहू किंवा ग्लूटेनयुक्त पदार्थ खाताच लहान आतड्यांना नुकसान होते, त्यामुळे पोषक घटक नीट शोषले जात नाहीत.

या आजाराची लक्षणे प्रत्येक व्यक्तीत वेगवेगळी असू शकतात. काही लोकांना गहू खाल्ल्यानंतर जुलाब, पोटदुखी, सूज, उलटी आणि वजन घटणे असे त्रास होतात. तर काहींना थकवा, अ‍ॅनिमिया, हाडांमध्ये वेदना, केस गळणे अशी लक्षणे दिसतात. अनेकदा ही लक्षणे इतकी सौम्य असतात की आजार बराच काळ लक्षातच येत नाही.

डॉक्टरांच्या मते, गव्हाशी संबंधित आणखी एक समस्या म्हणजे नॉन-सिलीअॅक ग्लूटेन सेन्सिटिव्हिटी ही असते. यात सिलीअॅकसारखे आतड्यांचे गंभीर नुकसान होत नाही, मात्र गहू किंवा ग्लूटेन खाल्ल्यानंतर पोट जड होणे, गॅस, डोकेदुखी, थकवा आणि एकाग्रतेत अडचण येऊ शकते. अशा स्थितीत गहू टाळणे फायदेशीर ठरते.

याशिवाय, काही लोकांना गव्हाची अ‍ॅलर्जीही असू शकते आणि ती विशेषतः मुलांमध्ये अधिक दिसून येते. गहू खाल्ल्यानंतर लगेचच खाज सुटणे, पुरळ येणे, श्वास घेण्यास त्रास होणे, उलटी किंवा सूज येणे अशी लक्षणे दिसू शकतात. गंभीर प्रकरणांमध्ये ही अ‍ॅलर्जी जीवघेणी ठरू शकते. त्यामुळे वेळेत ओळख करून डॉक्टरांचा सल्ला घेणे अत्यंत महत्त्वाचे आहे.

आरोग्यतज्ज्ञ सांगतात की गव्हाचे पीठ प्रत्येकासाठी हानिकारक नसते; मात्र ते खाल्ल्यानंतर वारंवार त्रास होत असल्यास त्याकडे दुर्लक्ष करू नये. अशा वेळी डॉक्टरांकडून तपासणी करून योग्य आहार पद्धती स्वीकारणे गरजेचे आहे. योग्य वेळी ओळख झाल्यास सिलीअॅक, ग्लूटेन सेन्सिटिव्हिटी किंवा गहू अ‍ॅलर्जी यांसारख्या समस्यांवर नियंत्रण ठेवता येते आणि निरोगी आयुष्य जगता येते. गव्हाशिवाय इतर अनेक पदार्थांच्या मदतीने तुम्ही हेल्दी आणि फिट राहू शकता.