Beautiful Beaches : रात्रीच्यावेळी लायटिंगसारखे चमकतात भारतातील हे 7 बीच! परदेशातही दिसणार असे सुंदर दृश्य

स्वराज द्वीप (हॅवलॉक बेट), अंदमान आणि निकोबार : हॅवलॉक बेट, याला आता अधिकृतपणे स्वराज द्वीप म्हटले जाते. हे बेट पांढऱ्या वाळूचे किनारे आणि समृद्ध सागरी जीवनासाठी प्रसिद्ध आहे. रात्री या बेटाचे काही भाग बायोल्युमिनेसेन्स इफेक्टमुळे चमकतात. खारफुटीच्या जंगलात कायाकिंग ट्रिप दरम्यान हे विशेषकरून दिसते. हे दृश्य नोव्हेंबर ते फेब्रुवारी दरम्यान सर्वात जास्त दिसते.

बंगाराम बेट, लक्षद्वीप : हल्ली लक्षद्वीप अनेक जणांच्या पर्यटनाच्या यादीत सामील झाले आहे. तिथले सौंदर्यच याचे कारण आहे. बंगाराम बेट हे लक्षद्वीपमधील एक निर्जन आणि शांत बेट आहे. तिथले निळे पाणी आणि नैसर्गिक सौंदर्य पर्यटकांना आकर्षित करते. काही रात्री या बेटाचे त्याचे किनारे बायोल्युमिनेसेन्सने चमकतात. ही चमक बेटाच्या मनमोहक वातावरणात आणखी भर घालते. मात्र इथे जाण्यासाठी अगोदरच नियोजन करावे लागते. त्याशिवाय इथे प्रवेश मिळत नाही.

बेतालबातीम बीच, गोवा : गोवा तसे सर्वांचे आवडते ठिकाण आहे. पण या खास दृश्याबद्दल फार कमी लोकांना माहित आहे. दक्षिण गोव्यात असलेले बेतालबातीम बीच उत्तर गोव्यातील इतर समुद्रकिनाऱ्यांपेक्षा शांत आहे आणि संध्याकाळच्या सुंदर दृश्यांमुळे याला 'सनसेट बीच' देखील म्हटले जाते. कधीकधी येथील लाटा बायोल्युमिनेसेन्सने चमकतात, ज्यामुळे किनाऱ्यावर फिरणे एक अनोखा अनुभव बनते.

मट्टू बीच, कर्नाटक : उडुपीजवळ मट्टू बीच हा नारळाच्या झाडांनी वेढलेले शांत ठिकाण आहे. येथे कधीकधी उष्ण महिन्यांत चमकणाऱ्या लाटा दिसतात. शांत वातावरण बायोल्युमिनेसेन्सची जादुई चमक आणखी वाढवते, ज्यामुळे पर्यटकांना नैसर्गिक सौंदर्य अनुभवायला मिळते.

तिरुवनमियुर बीच, तामिळनाडू : तिरुवनमियुर हे एक शांत ठिकाण आहे. स्थानिकांनी कधीकधी येथे चमकणाऱ्या लाटा पाहिल्या आहेत, ज्यामुळे ते बायोल्युमिनेसेन्स अनुभवण्यासाठी आणखी एक सुंदर ठिकाण बनले आहे. रात्री उशिरा समुद्रकिनारा शांत आणि कमी गर्दीचा असताना भेट दिल्यास बायोल्युमिनेसेन्स दिसण्याण्याची शक्यता वाढते.

महाराष्ट्रातील अक्सा बीच : मुंबईच्या वर्दळीच्या समुद्रकिनाऱ्यांच्या तुलनेत मालाडजवळील अक्सा बीच, त्याच्या शांत वातावरणासाठी ओळखला जातो. येथे अधूनमधून बायोल्युमिनेसेन्स अ‍ॅक्टिव्हिटी दिसते. तेव्हा इथले सौंदर्य वाढते. आराम करू इच्छिणाऱ्यांसाठी अक्सा बीच हा एक उत्तम पर्याय आहे.

कर्नाटकातील पादुबिद्री बीच : पादुबिद्री बीच त्याच्या सौंदर्यासाठी प्रसिद्ध आहेच. सोबतच हे ब्लू फ्लॅग प्रमाणित आहे, म्हणजेच ते स्वच्छता आणि सुरक्षिततेच्या आंतरराष्ट्रीय मानकांची पूर्तता करते. काहीवेळा रात्री येथे बायोल्युमिनेसेन्स घडते. यामुळे या पर्यावरणपूरक समुद्रकिनाऱ्याला एक मोहक चमक मिळते.