31 डिसेंबरला नारळाच्या दुधाचा वापर करून घरीच बनवा केरळी स्टाईल ‘ही’ रेसिपी; बनवण्याची सोपी पद्धत पाहा

नॉनव्हेज मधील प्रत्येक पदार्थ योग्य पद्धतीने आपल्याला घरी बनवणे शक्य होत नाही. त्यामुळेच आपल्याला हॉटेलमध्ये जावे लागते. मात्र कोल्हापूरच्या डाइन इन् या हॉटेलचे शेफ असलेल्या इजाज सय्यद यांनी केरळी स्टाईल मच्छी करी असलेल्या मीन मोईली या पदार्थाची पाककृती सांगितली आहे.

मीन मोईली मच्छी करी ही माशाची केरळ शैलीतील प्रसिद्ध मलईदार आणि स्वादिष्ट पाककृती आहे. यामध्ये छोटे माशांचे गोलाकार काप मसालेदार अशा नारळाच्या दुधाच्या ग्रेव्हीमध्ये शिजवले जातात.

मीन मोईली बनवण्यासाठी सुरमई किंवा पापलेट माशाचे काप हे सुरुवातीला आले, लसूण, हळद, मीठ लावून अर्धा तास मॅरीनेट करुन ठेवावेत. तर पाककृतीसाठी कडीपत्ता, मोहरी, हळद, 2 उभ्या चिरलेल्या हिरव्या मिरच्या, एक वाटी बारीक चिरलेला कांदा आणि एक मोठी वाटी नारळाचे दूध लागते. याव्यतरिक्त नारळाचे तेल हा पदार्थ बनवताना वापरावे.

सुरुवातीला पॅनमध्ये थोडे नारळाचे तेल घेऊन त्यात मोहरी टाकावी. मोहरी छान तडतडल्यावर कडीपत्ता, हिरव्या मिरच्या आणि बारीक चिरलेला कांदा टाकून परतून घ्यावे आणि यामध्ये थोडेसे मीठ टाकावे.

त्यानंतर थोडीशी हळद आणि माशांच्या कापांच्या संख्येनुसार अंदाजे थोडे पाणी या मिश्रणात टाकावे. मिश्रण छान उकळू द्यावे आणि एक छोटा अर्धा लिंबू आपल्याला लागेल तितका आपण त्या मिश्रणात पिळावा.

चांगले उकळल्यानंतर माशांचे काप यामध्ये टाकून ते काप व्यवस्थित शिजवून घ्यावेत. शेवटी मासा शिजल्याची खात्री करावी आणि गॅस मंद आचेवर ठेवून कच्च्या नारळाचे दूध त्यात मिसळावे. सर्व मिश्रण 2-3 मिनिटे छान उकळल्यानंतर मीन मोईली डिश तयार होते.

ही डिश आपण पांढरा भात, केरळी परोठा, आप्पे, डोसा आदींसोबत खाऊ शकता. तर ही डिश 1-2 दिवस फ्रिजमध्ये राहू शकते. खाताना गरम करून घेऊन आपण या डिशचा आस्वाद घेऊ शकतो, असं शेफ इजाज यांनी सांगितले आहे.