अंगदुखीपासून डेंग्यूपर्यंत 'ही' रोपं रामबाण! घराच्या खिडकीत करू शकता लागवड

तुळशीचं रोप हे जवळपास प्रत्येक घरात पाहायला मिळतं. आयुर्वेदात आणि धार्मिक शास्त्रात तुळशीला अनन्यसाधारण महत्त्व आहे. सकाळी उठल्यावर तुळशीची पानं खाल्ल्यास मलेरिया, डेंग्यू असे गंभीर आजार होण्यापासून शरिराचं संरक्षण होतं. शिवाय दातदुखी असेल तर तीदेखील दूर होते. इतकंच नाही, तर ताप, घसादुखी असल्यास तुळशीची पानं घातलेला चहा पिण्याचा सल्ला दिला जातो.

वास्तूशास्त्रात मनी प्लांटला अनन्यसाधारण महत्त्व आहे. या झाडामुळे घरात लक्ष्मीचा वास निर्माण होतो, असं मानलं जातं. शिवाय घरातली हवा शुद्ध राहण्यासाठी आयुर्वेदात हे झाड सर्वोत्तम मानलं गेलं आहे. विशेष म्हणजे मोबाईल किंवा कॉम्प्युटर आणि लॅपटॉपमधून निघणारी घातक किरणं शोषून घेण्याची क्षमता या झाडात असते. परंतु या झाडाची पानं खाऊ नये किंवा त्याचा कोणताही वापर करू नये.

कोरफड त्वचा आणि केसांसाठी गुणकारी असतं त्यामुळे त्यापासून विविध सौंदर्य प्रसाधनं बनवली जातात. आपल्या घरी कोरफडाचं रोप असेल तर त्याच्या गराचा आपण वापर करू शकता. ज्यामुळे त्वचा छान तुकतुकीत आणि केस चमकदार होतात. शिवाय विविध आजार दूर करण्यासाठी आणि औषधं बनवण्यासाठीही कोरफड उपयुक्त असतं.

वडाच्या झाडाला प्रचंड धार्मिक महत्त्व आहे. या झाडाची पूजा केली जाते. तर, या झाडाचं खोड आणि साल अनेक आजारांवर गुणकारी असते. वडाच्या सालीमुळे शरिराची रोगप्रतिकारक शक्ती वाढते, तर खोडामुळे केस गळणं, केस पांढरे होणं यावर आराम मिळतो. त्यासाठी खोडाची पावडर करून तिची पेस्ट केसांना लावण्याचा सल्ला दिला जातो. तसंच शरिरावर जखम झाली असल्यास त्याजागी वडाची पानं गरम करून लावल्यास रक्तस्त्राव थांबतो.

पिंपळाच्या झाडातून बाहेर पडणारं ऑक्सिजन सर्वाधिक उपयुक्त मानलं जातं. म्हणूनच उन्हाळ्यात ठिकठिकाणी या झाडाखाली माणसं सावली घेताना दिसतात. तसंच शरिरावर कुठेही सूज आल्यास त्यावर पिंपळाची साल गुणकारी असते. या सालीचा काढा बनवून प्यायल्यास आराम मिळतो.