Kaju katli Recipe : दिवाळीसाठी घरच्या घरी सोप्या पद्धतीने बनवा काजू कतली, मिनिटांत रेडी होईल स्वीट ट्रीट!

दिवाळी म्हटलं की, घरात गोडधोड आणि मिठायांचा सुगंध दरवळतो. पण साखरेऐवजी गुळाचा वापर करून बनवलेले पदार्थ आरोग्यासाठी अधिक चांगले मानले जातात. यंदाच्या दिवाळीला पारंपरिक साखरेची काजू कतली न बनवता, केवळ 4 साहित्यामध्ये आरोग्यदायी आणि चविष्ट 'गुळाची काजू कतली' बनवण्याची सोपी कृती आम्ही तुमच्यासाठी घेऊन आलो आहोत. ही खास स्वीट ट्रीट अवघ्या काही मिनिटांत तयार होते आणि लहानांपासून मोठ्यांपर्यंत सगळ्यांना आवडते.

काजूची पावडर तयार करा: मिक्सरच्या भांड्यात काजू घ्या आणि 'पल्स मोड' वापरून त्याची बारीक पावडर बनवा. मिक्सर जास्त वेळ चालवू नका, नाहीतर काजूतून तेल सुटून त्याचा गोळा बनेल.

गुळाचा पाक तयार करा: एका पॅनमध्ये किसलेला गूळ आणि अगदी थोडे पाणी घालून मंद आचेवर गरम करा. गूळ पूर्णपणे वितळेपर्यंत ढवळत राहा. याचा एक तारी पाक तयार करायचा आहे.

मिश्रण एकत्र करा: गुळाच्या पाकात काजूची पावडर घाला आणि मिश्रण चांगले मिसळून घ्या. हे मिश्रण हळूहळू घट्ट होऊन पॅन सोडायला लागेल. हे मिश्रण जास्त शिजवू नका, नाहीतर कतली कडक होईल.

तूप लावून मळा: एका बटर पेपरवर किंवा तुपाचा हात लावलेल्या प्लेटवर हे मिश्रण काढा. ते गरम असतानाच तुपाचा हात लावून मऊ गोळा होईपर्यंत मळून घ्या.

लाटून आकार द्या: या गोळ्याला बटर पेपरच्या मदतीने हलके लाटून घ्या. तुम्हाला हव्या असलेल्या जाडीनुसार ते लाटा. नंतर यावर चांदीचा वर्क लावू शकता किंवा पिस्त्याचे तुकडे टाकू शकता.

कतली कापून सेट करा: हे मिश्रण थोडे गार झाल्यावर (किंवा सुमारे 10 मिनिटांनी) सुरीने डायमंडच्या आकारात कतलीचे तुकडे कापून घ्या. अशा प्रकारे तुमची हेल्दी गुळाची काजू कतली तयार आहे.