Marathwada Rain: मंगळवार पावसाचा! छ. संभाजीनगर ते बीड धो धो कोसळणार, मराठवाड्यात पुन्हा अलर्ट

राज्यात गेल्या काही दिवसांत पावसाचं धुमशान सुरू आहे. कोकण, पश्चिम महाराष्ट्र, मराठवाडा आणि विदर्भातील बहुतांश जिल्ह्यांत पावसाचा जोर कायम आहे. मराठवाड्यात देखील विजांच्या कडकडाटासह मुसळधार ते अतिमुसळधार पाऊस होत आहे. आज पुन्हा मराठवाड्यातील 7 जिल्ह्यांना यलो अलर्ट देण्यात आला आहे.

मराठवाड्यातील छत्रपती संभाजीनगरसह 7 जिल्ह्यांना पुढील 24 तास जोरदार पावसाचा यलो अलर्ट देण्यात आला आहे. या काळात ताशी 30 ते 40 किमी वेगाने वारे वाहण्याची शक्यता आहे. या काळात छत्रपती संभाजीनगरसह जालना, परभणी, बीड, हिंगोली, नांदेड आणि लातूर या जिल्ह्यांत विजांसह जोरदार पाऊस होईल.

धाराशिवमधील हवामानात बदल जाणवत आहेत. आज काही ठिकाणी मध्यम पावसाचा अंदाज आहे. परंतु, सतर्कतेचा कोणताही इशारा देण्यात आला नाही.

पुढील 24 तासांत मराठवाड्यातील हवामानात मोठे बदल जाणवणार आहेत. पावसाची तीव्रता कमी होणार असून बुधवारपासून पुढील काही दिवस एकाही जिल्ह्याला सतर्कतेचा इशारा नसणार आहे. मात्र, तुरळक हलका पाऊस कायम राहण्याची शक्यता आहे.

मराठवाड्यातील काही ठिकाणी झालेल्या अतिवृष्टीमुळे शेती पिकांचे मोठे नुकसान झाले आहे. ओढे, नाले तुडूंब भरून वाहात असून नद्यांची पाणीपातळी देखील वाढली आहे. त्यात पावसाचा जोर कायम असल्याने नागरिकांना योग्य ती काळजी घ्यावी लागेल.