Weather Alert: विजा अन् ढगांचा बँडबाजा, बाप्पांच्या आगमनाला येणार वरुणराजा, मराठवाड्यातील हवामान अंदाज

आज गणेश चतुर्थीला गणपती बाप्पाचे आगमन होणारं आहे. अशातच हवामानात मोठे बदल जाणवत आहेत. राज्यात पुन्हा पावसाचा जोर वाढला आहे. मराठवाड्यातील काही जिल्ह्यांना हवामान विभागाने आज यलो अलर्ट जारी केला आहे. पुढील 24 तासांचा हवामान अंदाज जाणून घेऊ.

‎‎मराठवाड्यातील छत्रपती संभाजीनगर, जालना, परभणी, हिंगोली आणि नांदेड या पाचही जिल्ह्यांना हवामान खात्याकडून आज यलो अलर्ट देण्यात आला आहे. विजांच्या कडकडाटासह या ठिकाणी ताशी 30 ते 40 किलोमीटर प्रमाणे वारे वाहतील. पुढील 3 दिवस या ठिकाणी यलो अलर्ट असल्याने नागरिकांना योग्य ती काळजी घ्यावी लागेल.

‎‎छत्रपती संभाजीनगर शहरात देखील 27 ऑगस्ट रोजी म्हणजेच गणपती बाप्पा आगमनाची दिवशी मुसळधार पावसाची शक्यता आहे. हवामान विभागाने छत्रपती संभाजीनगरला 72 तासांसाठी यलो अलर्ट जारी केला आहे. त्यामुळे गणपती आगमानाला विजांच्या कडकडाटात जोरदार पावसाची शक्यता असून नागरिकांना योग्य ती काळजी घ्यावी लागेल.

‎‎बीड, लातूर आणि धाराशिव या तिन्ही जिल्ह्यांना हवामान खात्याकडून कोणत्याही प्रकारचा अलर्ट देण्यात आलेला नाही. या ठिकाणी हलक्या ते मध्यम पावसाची शक्यता आहे. धाराशिव वगळता इतर दोन जिल्ह्यात 24 तासानंतर पावसाची तीव्रता वाढणार आहे.

दरम्यान, ‎मराठवाड्यातील हवामानात सातत्याने बदल जाणवत आहेत. गणपती आगमनाच्या दिवशी म्हणजेच 27 ऑगस्ट रोजी वेगवान वारे आणि विजांसह पावसाचा अंदाज असल्याने नागरिकांना योग्य ती काळजी घ्यावी लागेल.