हॉलिवूडच्या सिनेमासारखी बीडमध्ये दुर्घटना, बर्निंग टँकर अन् रस्त्यावर दूरपर्यंत पसरली आग, PHOTOS

बीड जिल्ह्यातील सोलापूर-धुळे राष्ट्रीय महामार्गावर आगीची घटना घडली आहे. एक डिझेलचा टँकर अचानक अनियंत्रित झाल्यामुळे पलटी झाला. त्यामुळे पलटी झाला आणि मोठा स्फोट झाला. या स्फोटानंतर महामार्गावर आग पसरली होती. आगीत काही जण अडकल्याची भीती वर्तवली जात आहे.

सोलापूर- धुळे राष्ट्रीय महामार्गावर बीडच्या मांजरसुंबा घाटात दुपारच्या सुमारास ही घटना घडली. महामार्गावरून जात असताना अचानक एक डिझेलचा टँक पलटी झाला.

डिझेलचा टँकर पलटी झाल्यानंतर मोठ्या प्रमाणात डिझेल रस्त्यावर सांडलं. त्यामुळे रस्त्यावरच आगीचा भडका उडाला. डिझेल सांडल्याने आग तब्बल 100 ते 200 मीटरपर्यंत पसरली होती.

आगीत टँकर पूर्णपणे जळून खाक झाला आहे. आगीमध्ये कुणी अडकलं आहे का, याची माहिती अद्याप मिळू शकली नाही.

पण, मांजरसुबा घाटामध्ये झालेल्या या भीषण अपघातामुळे एकच घबराट पसरली होती. अपघातस्थळावरून नागरिकांनी पळ काढला.

डिझेल टँकरचा स्फोट झाल्यानंतर आगीचा भडका उडाला होता. दूरपर्यंत धुराचे लोट दिसून येत होते. महामार्गावर टँकर पलटी झाल्यामुळे अनेकांनी आपली वाहनं थांबवून माघारी परतले होते.

आगीची माहिती मिळताच वाहतूक पोलीस आणि अग्निशमन दलाच्या गाड्या घटनास्थळी दाखल झाल्या आहेत. आग विझवण्याचं काम युद्धपताळीवर सुरू आहे.