Palghar News : 'दादा पुढे जाऊ नको..' पालघरमध्ये चिमुकल्यांच्या प्रसंगावधानामुळे वाचले दोघांचे जीव

पालघरमध्ये मागील 3 दिवसांपासून मुसळधार पाऊस पडत असून यामुळे अनेक ठिकाणी विद्युत पुरवठा खंडित झाला होता. अनेक ठिकाणी विद्युत पुरवठा सुरू असताना देखील विद्युत वाहिन्या तुटून पडल्याच्या घटना समोर आल्या होत्या.

पालघरच्या लोकमान्य नगर येथील वसंत विहार बिल्डिंगच्या समोर विजेच्या खांबावरील पाचपैकी एक विद्युत वाहिनी तुटून पडली असून यामुळे मोठी दुर्घटना घडण्याची शक्यता होती. मात्र, विद्युत वाहिनी तुटताना जोराने झालेल्या आवाजामुळे समोरच्या ऋषभ अपार्टमेंटमध्ये राहणाऱ्या स्विम भंडारे वय(12) आणि त्याची लहान बहीण संस्कृती भंडारे (8) यांनी अपार्टमेंटच्या गॅलरीत धाव घेतली.

या तुटलेल्या तारेतून विद्युत पुरवठा सुरू असतानाच समोरील इमारतीतून मोहम्मदरझा हा दहा वर्षीय चिमुकला बाहेर जाण्यास निघाला. मात्र या दोन्ही भावा बहिणींनी त्याला गॅलरीतून आवाज देत विद्युत वाहिनी तुटली असून पुढे जाऊ नको असं सांगितल्यानंतर हा चिमुकला पुन्हा परतला.

हे दोन्ही चिमुकले गॅलरीतच असताना पालघरच्या रसम हॉटेलचा झोमॅटो फूड डिलिव्हरी बॉय किशन कुमार हा देखील जेवणाच पार्सल देण्यासाठी वसंत विहार बिल्डिंगमध्ये जात असताना 'काका गेटवर वायर तुटली आहे, लाईट सुरू आहे, पुढे जाऊ नका' असं ओरडून सांगत या तरुणाला ही या दोन्ही चिमुकल्यांनी सावध केलं.

या दोन्ही चिमुकल्यांनी दाखवलेल्या प्रसंगावधानामुळे दोघांचे जीव वाचले असून या दोन्ही चिमुकल्यांच पालघर मधून कौतुक होत आहे.