Photo: पुण्यातील भैरोबा नाल्यापासून थेट यवतपर्यंत उड्डाणपूल, अजित पवारांची मोठी घोषणा

नागरीकरणाचा वेग वाढता असल्यामुळे शहरांमध्ये निर्माण होणारी वाहतूक कोंडीची समस्या सोडविण्यास शासनाचे प्राधान्य असल्याचे सांगत हडपसर ते यवत या प्रस्तावित उड्डाणपुलाच्या कामात महत्त्वाचा बदल करण्यात आला असून पुण्यातील भैरोबा नाल्यापासून थेट यवतपर्यंत उड्डाणपूल होणार असल्याची घोषणा राज्याचे उपमुख्यमंत्री अजित पवार यांनी विधानसभेत सांगितले.

पायाभूत सुविधा आणखी मजबूत करण्यावर आपल्या सरकारचा भर आहे. पुणे ते सोलापूर महामार्गावरील वाहतूक कोंडीवर उपाय म्हणून आधीच्या प्लॅनमध्ये सुधारणा करण्यात आली आहे. त्यासंदर्भात नव्या प्रस्तावाला मुख्यमंत्री महोदयांनी मंजुरी दिली असल्याचे अजित पवार यांनी सांगितले.

नव्या प्लॅननुसार हडपसरऐवजी भैरोबा नाल्यापासून उड्डाणपूल सुरू होईल आणि तो थेट यवतपर्यंत सहा पदरी स्वरूपात जाणार आहे. सदर काम लवकरात लवकर मार्गी लागेल, यासाठी आम्ही प्रयत्नशील आहोत, असे अजित पवार म्हणाले.

पुणे शहरातून सोलापूरकडे जाण्यासाठी राष्ट्रीय महामार्ग 65 वरून जावे लागते. हडपसर परिसरात गेल्या काही वर्षांत मोठ्या प्रमाणात नागरीकरण झाल्यामुळे येथे वाहतूक वाढली आहे.

सोलापूरहून शहरात येणारी किंवा पुण्यातून सोलापूरच्या दिशेने जाणाऱ्या वाहनांना अनेकदा वाहतूक कोंडीचा सामना करावा लागतो. ही समस्या सोडवण्यासाठी हडपसरऐवजी आता भैरोबा नाला येथून उड्डाणपुलाचे काम सुरू करण्यात येणार आहे.