7.5 कोटी EPFO सदस्यांसाठी खुशखबर! 5 लाख रुपयांपर्यंत पैसे काढता येणार

नवी दिल्ली: कर्मचारी भविष्य निर्वाह निधी संघटनेच्या (EPFO) 7.5 कोटी सदस्यांसाठी आनंदाची बातमी आहे. सरकारने पीएफ ऑटो-सेटलमेंटच्या मर्यादेत मोठा बदल करत ती 1 लाख रुपयांवरून 5 लाख रुपये करण्याचा निर्णय घेतला आहे. याचा मोठा फायदा कर्मचारी वर्गाला होणार आहे, कारण यामुळे आता पीएफ दाव्याचा निपटारा केवळ 3-4 दिवसांत होऊ शकतो. यापूर्वी, हा कालावधी सुमारे 10 दिवसांचा होता.

पूर्वी फक्त आजारपण आणि रुग्णालयाच्या खर्चासाठी ऑटो-क्लेम सुविधा उपलब्ध होती. मात्र, आता हा नियम बदलण्यात आला असून, शिक्षण, लग्न आणि घर खरेदीसाठी देखील पीएफ ऑटो-क्लेम करता येणार आहे. यामुळे कर्मचारी त्यांच्या जीवनातील महत्त्वाच्या टप्प्यांवर आर्थिक मदत सहज मिळवू शकतील.

कामगार आणि रोजगार मंत्रालयाच्या सचिव सुमिता डावरा यांच्या अध्यक्षतेखाली 28 मार्च रोजी श्रीनगरमध्ये झालेल्या केंद्रीय विश्वस्त मंडळाच्या (CBT) 113 व्या बैठकीत हा निर्णय घेण्यात आला. EPFOच्या CBT कडून अंतिम मंजुरी मिळाल्यानंतर ही सुविधा लागू केली जाईल. यामुळे कर्मचारी वर्गासाठी मोठा दिलासा मिळणार आहे आणि त्यांच्या आर्थिक गरजा अधिक सोप्या पद्धतीने पूर्ण होतील.

सरकार आणखी एक मोठा बदल करत असून, EPFO सदस्यांना यंदाच्या मे किंवा जून 2025 अखेरपर्यंत UPI आणि ATMच्या माध्यमातून पीएफ काढण्याची सुविधा मिळणार आहे. यामुळे कर्मचारी आपल्या गरजेनुसार कोणत्याही वेळी त्वरित पैसे काढू शकतील.

EPFO सदस्यांना त्यांचा पीएफ बॅलन्स थेट UPI प्लॅटफॉर्मवर तपासता येणार असून, कोणत्याही विलंबाशिवाय त्यांच्या पसंतीच्या बँक खात्यात निधी हस्तांतरित करता येईल.EPFOच्या नव्या प्रणालीनुसार, आता तब्बल 95% दावे स्वयंचलितपणे मंजूर केले जातील.

यामुळे कर्मचारी आपले पीएफचे पैसे त्वरित मिळवू शकतील आणि कागदपत्रांसाठी लागणारा वेळ वाचेल. याआधी पीएफ क्लेमसाठी 27 टप्पे होते, जे आता 18 करण्यात आले आहेत आणि लवकरच केवळ 6 टप्पे शिल्लक राहतील. यामुळे क्लेम प्रक्रिया अधिक वेगवान आणि पारदर्शक होणार आहे.

सरकारच्या या निर्णयामुळे लाखो कर्मचारी आणि निवृत्त व्यक्तींना मोठा दिलासा मिळणार आहे. आता तातडीच्या आर्थिक गरजांसाठी पीएफ काढणे अधिक सोपे आणि जलद होणार आहे. नवीन तंत्रज्ञानाच्या मदतीने EPFOची सेवा आणखी पारदर्शक आणि सोयीस्कर बनणार आहे.