Home Loan घ्यायचा विचार करताय? मग या चार्जेसविषयी घ्या जाणून, होईल फायदा

प्रत्येकाचे स्वप्न असते की त्याचे स्वतःचे घर असावे. घर ही कोणत्याही व्यक्तीच्या आयुष्यातील सर्वात मोठी खरेदी असते. म्हणूनच, बहुतेक लोक घर खरेदी करताना होम लोन घेतात. होम लोन हे सर्वात जास्त कालावधीचे कर्ज आहे.

होम लोनमध्ये, तुम्हाला दीर्घकाळासाठी व्याज म्हणून खूप पैसे द्यावे लागतात. म्हणून, होम लोन घेताना संपूर्ण चौकशी करावी. होम लोनबाबत इतरही विविध शुल्क आकारले जातात, ज्यांची तुम्हाला जाणीव असायला हवी. हे चार्जेज काय आहेत ते पाहूया.

अर्ज शुल्क : तुमच्या होम लोन अॅप्लिकेशनच्या प्रोसेसिंगसाठी बँक तुमच्याकडून अर्ज शुल्क आकारते. या शुल्काचा तुम्हाला कर्ज मिळते की नाही याच्याशी काहीही संबंध नाही आणि ते परतफेड करण्यायोग्य नाही. तुम्ही तुमचा अर्ज एखाद्या बँकेत किंवा वित्तीय संस्थेत सादर केला आणि नंतर तुमचा विचार बदलला तर तुमची अर्ज फी वाया जाईल. ही फी एकतर स्थिर आहे किंवा कर्जाच्या टक्केवारी म्हणून आहे. जर बँक इच्छित असेल तर ती हे शुल्क माफ देखील करू शकते. जर तुम्ही मॅनेज करण्यात एक्सपर्ट असाल तर तुम्ही हे शुल्क माफ किंवा कमी करू शकता.

मॉर्गिज डीड फीस : होम लोन घेताना तुम्हाला हा एक मोठा चार्ज भरावा लागतो. हे सहसा होम लोनच्या टक्केवारीचे असते आणि कर्ज घेण्यासाठी भरलेल्या एकूण शुल्काच्या रकमेचा एक मोठा भाग असते. होम लोन प्रॉडक्ट अधिक आकर्षक बनवण्यासाठी काही संस्था हे चार्ज माफ करतात.

लीगल फीस : वित्तीय संस्था सामान्यतः मालमत्तेच्या कायदेशीर स्थितीची तपासणी करण्यासाठी बाहेरील वकील नियुक्त करतात. यासाठी वकील जे फीस आकारतात ते वित्तीय संस्था त्यांच्या क्लायंटकडून वसूल करतात. तसंच, जर प्रॉपर्टीला संस्थेने आधीच कायदेशीर मान्यता दिली असेल, तर हा शुल्क आकारला जात नाही.

कमिटमेंट फीस : लोनची प्रोसेसिंग आणि मंजुरी झाल्यानंतर निर्धारित कालावधीत कर्ज वितरित न झाल्यास काही संस्था वचनबद्धता शुल्क आकारतात. हे एक शुल्क आहे जे वितरित न झालेल्या कर्जांवर आकारले जाते. उदाहरणार्थ, बांधकाम कर्जांसाठी, कर्ज वितरणासाठी प्रकल्प पूर्ण होण्याचा टप्पा महत्त्वाचा असतो. कर्ज देणाऱ्या संस्था तुमच्यासाठी ही क्रेडिट लाइन उघडी ठेवतात परंतु भविष्यात तुम्हाला हे कर्ज मिळू शकेल म्हणून विशिष्ट रक्कम आकारतात. हे शुल्क सहसा मंजूर आणि वितरित रकमेतील फरकाच्या टक्केवारी म्हणून आकारले जाते.

प्रीपेमेंट पेनल्टी : वेळेपूर्वी कर्ज फेडल्याने बँकेला व्याजदराचे नुकसान होते, म्हणून काही प्रमाणात हे नुकसान भरून काढण्यासाठी बँक दंड आकारते. वेगवेगळ्या बँकांमध्ये हे शुल्क वेगवेगळे असते. ते कर्जाच्या प्रकारावर देखील अवलंबून असते. परंतु, आरबीआयने सर्व बँकांना फ्लोटिंग व्याजदरांवर घेतलेल्या गृहकर्जांवर प्रीपेमेंट दंड आकारू नये असे निर्देश दिले आहेत. फिक्स्ड रेट होम लोनवर फ्लॅट रेट प्रीपेमेंट पेनल्टी लागू होते जी आगाऊ देय रकमेच्या 2 टक्के पर्यंत असू शकते. म्हणून, जर तुम्हाला तुमचे गृहकर्ज वेळेपूर्वी परत करायचे असेल, तर तुम्हाला हा घटक देखील विचारात घ्यावा लागेल.