Weather Alert: कोकणात थंडीचा कडाका, मुंबई-ठाण्याचा पारा पुन्हा घसरणार, आजचं हवामान अपडेट

डिसेंबरच्या सुरुवातीलाच महाराष्ट्रात हळूहळू थंडी वाढू लागली आहे. राज्यातील काही भागात हवामान खात्याने यलो अलर्ट जारी केला आहे, विशेषत: विदर्भ आणि मराठवाडा परिसरात गारठा व थंड वाऱ्याची तीव्रता वाढल्यामुळे सतर्कतेचा इशारा देण्यात आला आहे. मुंबईसह कोकणातील बुधवार, 3 डिसेंबर रोजीचं हवामान अपडेट जाणून घेऊ.

मुंबईत थंडीचा प्रभाव आणखीन स्पष्ट होत आहे. किमान तापमान 19–20°C पर्यंत खाली आले असून सकाळी हलका गारवा जाणवतो. दिवसा तापमान 29–30°C च्या आसपास राहणार आहे. वातावरण पूर्णपणे स्वच्छ असून आकाश निरभ्र राहील. समुद्राकडून वाहणारा थंड वारा सतत असल्यामुळे संध्याकाळी हवेत थंडावा अधिक जाणवेल.

ठाणे आणि नवी मुंबईत तापमानात 1-2 अंशांची आणखी घट दिसत आहे. किमान तापमान 17–19°C, तर दिवसा तापमान 29–31°C दरम्यान राहील. सकाळी गार वाऱ्यामुळे थंडी जास्त जाणवेल. हवेत कोरडेपणा असल्याने पावसाची कोणतीही शक्यता नाही. दिवसा हलकी उष्णता जाणवली तरी वातावरण थंडच राहील.

पालघरमध्ये उष्णतेपेक्षा गारवा अधिक आहे. किमान तापमान 15–17°C पर्यंत घसरले आहे, जे कोकण आणि मुंबईच्या तुलनेत कमी आहे. दिवसा तापमान 28–30°C दरम्यान राहणार आहे. सकाळी धुरकेसारखा गारवा जाणवण्याची शक्यता आहे. आकाश स्वच्छ आणि हवा कोरडी राहील.

रायगड, रत्नागिरी , सिंधुदुर्ग कोकणातील या तीनही जिल्ह्यांमध्ये थंडीचा जोर कायम आहे. रायगडच्या काही भागात तापमान 16–17°C पर्यंत घसरले आहे. दिवसा तापमान 30–32°C दरम्यान असेल. सायंकाळी गार वाऱ्याचा प्रभाव जास्त असून हवामान कोरडेच राहणार आहे. पावसाचा कोणताही अंदाज नाही.