Weather Alert: महाराष्ट्रात वारं फिरलं, मुंबई-ठाण्यात धो धो कोसळणार, कोकणातील 6 जिल्ह्यांना अलर्ट

गेल्या काही दिवसांपासून कोकणात पावसाचा जोर कायम आहे. आज, 26 सप्टेंबर रोजी हवामान विभागाने मुंबई, ठाणे, नवी मुंबई, पालघर, रायगड, रत्नागिरी आणि सिंधुदुर्ग या सर्व जिल्ह्यांसाठी यलो अलर्ट दिला आहे. त्यामुळे आज संपूर्ण कोकण किनारपट्टीवर मुसळधार पावसाची स्थिती राहणार आहे.

मुंबईत आज सकाळपासूनच जोरदार सरी पडत आहेत. दिवसभर शहरात मुसळधार पावसाचा मारा सुरू राहील. तापमान 27 ते 30 अंश सेल्सिअसच्या दरम्यान राहणार आहे. जोरदार पावसामुळे रस्त्यांवर पाणी साचणे, वाहतूक विस्कळीत होणे आणि लोकल सेवेवर परिणाम होण्याची शक्यता आहे.

ठाणे आणि नवी मुंबईत आज यलो अलर्ट देण्यात आला आहे. आज नवी मुंबईत वाशी, नेरुळ, बेलापूरसह अनेक भागांत मुसळधार पाऊस सुरू आहे. दिवसभर पावसाचा जोर कायम राहील. ठाणे जिल्ह्यात आज सकाळपासूनच पावसाचा जोर आहे. दिवसभर ढगाळ वातावरण आणि सततच्या सरी सुरू राहतील. काही भागांत मुसळधार पावसामुळे रस्ते आणि गल्ल्यांमध्ये पाणी साचू शकते. वाऱ्याचा वेगही मध्यम ते जास्त राहण्याची शक्यता आहे.

पालघर जिल्ह्यात ग्रामीण भाग आणि किनारपट्टीवर मुसळधार पाऊस सुरू आहे. गेली 2 ते 3 सलग पावसामुळे पालघरमध्ये अनेक ठिकाणी पाणी साचलं आहे. तर आजही यलो अलर्ट असल्यामुळे या भागात पाऊस सकाळपासून चांगलाच पडतोय . पालघरमध्ये तापमान 25 ते 28 अंश सेल्सिअस दरम्यान राहील.

दक्षिण कोकणातील रायगड, रत्नागिरी आणि सिंधुदुर्ग या तिन्ही जिल्ह्यांमध्ये आज पावसाचा जोर कायम राहणार आहे. रायगडमधील घाटमाथ्यावर मुसळधार पाऊस सुरू असून काही ठिकाणी भूस्खलनाचा धोका आहे. रत्नागिरी आणि सिंधुदुर्गात जोरदार पाऊस आणि सोसाट्याचे वारे वाहत आहेत. समुद्र खवळलेला असल्यामुळे मच्छीमारांना समुद्रात न जाण्याचा इशारा देण्यात आला आहे.