Weather Alert: 21 नोव्हेंबरला बदलणार हवा; मुंबईसह कोकणात अलर्ट नवा, आजचं हवामान अपडेट

यंदा हवामान चक्रात मोठे बदल जाणवत आहेत. दिवाळीनंतर नोव्हेंबरच्या पहिल्या आठवड्यापर्यंत पावसाने हजेरी लावली. त्यानंतर थंडीचा कडाका वाढला आहे. सुरुवातीला मुंबईसह उपनगरांत सकाळी किंवा संध्याकाळीच थंडी जाणवत होती, पण आता तीव्रता वाढत आहे. मात्र त्यापेक्षा ठाणे, नवी मुंबई, कल्याण आणि पालघर या बाजूला गारठा अधिक जाणवत आहे. कोकणात पारा घसरला असून 21 नोव्हेंबरचं हवामान अपडेट जाणून घेऊ.

21 नोव्हेंबरला मुंबईतील सकाळच्या वेळचे तापमान 16–17°C दरम्यान राहू शकते. हे तापमान गेल्या काही दिवसांच्या तुलनेत कमी आहे. दुपारच्या सुमारास तापमान 30–32°C पर्यंत जाईल. दिवस उबदार राहील, पण सकाळ-संध्याकाळची थंडी कायम राहील. हवामान स्वच्छ आणि कोरडे राहण्याची शक्यता आहे.

ठाणे आणि नवी मुंबईत 21नोव्हेंबरला मुंबईपेक्षा जास्त थंडी जाणवेल. या भागातील ग्रामीण परिसर आणि माळशेज घाटाजवळील क्षेत्रामुळे रात्रीचा गारवा जास्त जाणवतो. किमान तापमान 15-16°C पर्यंत खाली येऊ शकते. रात्रीही गारवा वाढेल. दिवसाचे तापमान 29–31°C दरम्यान राहील. सकाळ-संध्याकाळचा गारवा शहरापेक्षा या भागांत जास्त तीव्र जाणवेल.

पालघरमध्ये प्रत्येक वर्षी थंडी लवकर आणि जास्त लागते. यामागचे कारण म्हणजे गुजरातच्या सीमेजवळ असलेला परिसर. गुजरातमध्ये थंडी वाढली की त्याचा थेट परिणाम पालघरवर होतो. 21 नोव्हेंबरला पालघरमधील सकाळचे तापमान 14–15°C इतके खाली जाऊ शकते. रात्री तापमान आणखी कमी जाणवण्याची शक्यता आहे. दिवसाचे तापमान साधारण 28°C राहील. तुलनेने हा भाग सर्वाधिक गार राहण्याची शक्यता आहे.

कोकणातील इतर जिल्ह्यांतही 21 नोव्हेंबरला थंडी वाढलेली राहील. रायगड, रत्नागिरी आणि सिंधुदुर्ग या तिन्ही ठिकाणी सकाळचे तापमान 15–17°C दरम्यान राहण्याचा अंदाज आहे. दुपारचे तापमान 28–30°C पर्यंत जाईल. किनारपट्टीच्या भागांत सकाळी गार हवा आणि दुपारी हलकी उब जाणवेल. घाटाजवळील भागात थंडी अधिक स्पष्ट जाणवेल.