Weather Alert: मुंबईसह कोकणात पावसाचं तुफान, ताशी 50 किमीने वारे वाहणार, 72 तास अलर्ट!

गेल्या काही दिवसांपासून महाराष्ट्रात तीव्र उकाडा आणि ऑक्टोबर हिटमुळे नागरिक हैराण झाले होते. पण आता हवामानात मोठा बदल पाहायला मिळतोय. काही ठिकाणी हलक्या सरी तर काही ठिकाणी मुसळधार पावसाने हजेरी लावली आहे. विशेष म्हणजे ऐन दिवाळीतच कोकण किनारपट्टीपासून मुंबईपर्यंत पावसाचा जोर वाढत आहे. पुढील 3 दिवस कोकणातील सर्वच जिल्ह्यांना यलो अलर्ट देण्यात आला आहे.

मुंबईत गुरुवारपासून सतत सरींचा सिलसिला सुरू आहे. दिवसभर ढगाळ वातावरण असून अधूनमधून जोरदार सरी कोसळत आहेत. हवामान विभागाने 24 ऑक्टोबर रोजी मुंबईसाठी यलो अलर्ट जारी केला आहे. पुढील काही तासांत मध्यम ते जोरदार पाऊस पडण्याची शक्यता आहे. सलग तीन दिवस पावसाची शक्यता वर्तवण्यात आली असून, नागरिकांना आवश्यक ती काळजी घेण्याचे आवाहन करण्यात आले आहे.

ठाणे आणि नवी मुंबई परिसरात देखील पावसाने जोर धरला आहे. गुरुवारी मुसळधार पावसामुळे नवी मुंबईतील महिला संघाची क्रिकेट मॅच रद्द करावी लागली. हवामान विभागाने या दोन्ही ठिकाणांसाठीही आज आणि उद्या यलो अलर्ट दिला आहे. पुढील 24 तासांत 30 ते 40 मिलीमीटर पाऊस पडण्याची शक्यता आहे.

पालघर जिल्ह्यात गेल्या काही दिवसांपासून उन्हाचा तडाखा होता, मात्र आता पावसाने पुन्हा हजेरी लावली आहे. आज दिवसभर मध्यम ते हलक्या सरींचा अंदाज हवामान विभागाने वर्तवला आहे. किनारपट्टी भागात अधूनमधून वारे आणि सरी येण्याची शक्यता असून, मच्छीमारांनी समुद्रात न जाण्याचा सल्ला देण्यात आला आहे.

कोकणातील रायगड, रत्नागिरी आणि सिंधुदुर्ग जिल्ह्यांमध्ये देखील जोरदार पावसाची शक्यता व्यक्त केली आहे. गेले काही दिवस कोकणात पाऊस आणि ऊन असे वातावरण आहे. पण गुरुवारपासून अनेक ठिकाणी जोरदार पाऊस होत आहे. त्यामुळे आज या भागांसाठीही यलो अलर्ट जारी करण्यात आला आहे. रत्नागिरी आणि सिंधुदुर्गात सरींसोबत वाऱ्यांचा जोर वाढल्याने हवामानात गारवा जाणवत आहे.