Weather Alert: महाराष्ट्रात पावसाचं धुमशान सुरूच, कोकणात अलर्ट, मुंबई-ठाण्यातून मोठं अपडेट

कोकणपट्टीसह मुंबई परिसरात गेल्या काही दिवसांत पावसाने जोरदार हजेरी लावली होती. रस्त्यांवर पाणी साचणे, वाहतुकीत अडथळे निर्माण होणे अशा अनेक समस्या निर्माण झाल्या होत्या. मात्र आज हवामान विभागाच्या अंदाजानुसार मुंबई आणि परिसरात पावसाची तीव्रता कमी राहणार आहे. तरीही कोकणातील काही जिल्ह्यांसाठी अलर्ट जारी करण्यात आला आहे.

गेल्या आठवडाभर मुंबई आणि आसपासच्या परिसरात जोरदार पावसाचा मारा झाला होता. मात्र आज हवामान विभागाने मुंबईसाठी कोणताही अलर्ट जारी केलेला नाही. सकाळपासून वातावरण ढगाळ असले तरी दिवसभर हलक्या ते मध्यम सरींचा अंदाज आहे. पावसाने थोडीशी विश्रांती घेतल्याने मुंबईकरांना दिलासा मिळणार आहे. शहरात आजचे कमाल तापमान सुमारे 28 अंश सेल्सिअस तर किमान तापमान 25 अंश सेल्सिअस राहील. वारे सौम्य ते मध्यम गतीने वाहतील.

ठाणे आणि नवी मुंबईत देखील आज पावसाची तीव्रता तुलनेने कमी राहणार आहे. या भागात रिमझिम पावसाच्या सरी अधूनमधून बरसतील तर काही ठिकाणी मध्यम स्वरूपाचा पाऊस होण्याची शक्यता आहे. तापमान मुंबईसारखेच राहणार असून दिवसभर आर्द्रता जास्त जाणवेल.

पालघर जिल्ह्यात मात्र काही भागात पाऊस मध्यम ते जोरदार स्वरूपाचा पडू शकतो, तर काही ठिकाणी केवळ रिमझिम सरी येतील. या भागात तापमान साधारण 28 अंश सेल्सिअसपर्यंत पोहोचेल आणि वारे मध्यम वेगाने वाहतील.

कोकण किनारपट्टीवरील रायगड, रत्नागिरी आणि सिंधुदुर्ग जिल्ह्यांमध्ये आज हवामान विभागाने येलो अलर्ट दिला आहे. या भागांत काही ठिकाणी जोरदार पावसाच्या सरी बरसतील तर काही ठिकाणी मोठ्या प्रमाणात पाऊस पडू शकतो. वार्‍याचा वेग किनारपट्टीवर थोडा जास्त जाणवेल, त्यामुळे मत्स्यव्यवसायिकांना समुद्रात जाण्याचे टाळण्याचा सल्ला देण्यात आला आहे. या जिल्ह्यांमध्ये कमाल तापमान 29 अंश सेल्सिअस तर किमान तापमान 25 अंश सेल्सिअस राहील.