Mumbai Rain: कोकणात बदलला वारा, मुंबई-ठाण्यात घामाच्या धारा, हवामान विभागाचा पुन्हा इशारा

पावसाळा सुरू होऊन दोन महिने उलटून गेले तरीही मुंबई, ठाणे, नवी मुंबई, पालघर आणि कोकण किनारपट्टीवरील जिल्ह्यांमध्ये गेले काही दिवस पावसाने विश्रांती घेतल्याचे चित्र दिसत आहे. श्रावण महिन्यात सरींची अपेक्षा असली तरी आज 6 ऑगस्ट रोजी कोकणात ढगाळ वातावरण असून, हलक्या पावसाच्या सरींची शक्यता काही भागांपुरती मर्यादित आहे. मुसळधार पावसाचा जोर मात्र कमी झाला आहे. यामुळे दिवस भर उकडणारे आणि दमट हवामान कायम राहणार आहे.

मुंबईत आज दिवसभर ढगाळ वातावरण असून, काही भागांमध्ये हलक्या सरी पडू शकतात. कमाल तापमान 30 अंश सेल्सियसच्या आसपास तर किमान तापमान 25 अंश सेल्सियसपर्यंत राहण्याची शक्यता आहे. आर्द्रतेचे प्रमाण अधिक असल्यामुळे उकाडा जाणवणार आहे. नागरिकांना दमट हवामानाचा त्रास होण्याची शक्यता आहे.

नवी मुंबई व ठाणे परिसरात हलक्या सरींसह ढगाळ हवामान राहणार आहे. काही भागांत सकाळच्या सुमारास थोडा पाऊस होण्याची शक्यता आहे, पण दिवसभरात जोरदार पावसाची शक्यता नाही. तापमान 27–30°C दरम्यान राहील. उष्णता आणि दमट हवेमुळे अस्वस्थता जाणवू शकते.

पालघर जिल्ह्यात आज हलक्या स्वरूपाचा पाऊस आणि ढगाळ वातावरण राहण्याची शक्यता आहे. हवामान खात्याने इथे कोणताही अलर्ट दिलेला नाही. कमाल तापमान 30°C पर्यंत जाईल आणि किमान तापमान 25°C दरम्यान राहील. आर्द्रता अधिक असल्यामुळे उन्हाळ्यासारखा उकाडा जाणवू शकतो.25°C दरम्यान राहील. आर्द्रता अधिक असल्यामुळे उन्हाळ्यासारखा उकाडा जाणवू शकतो.

कोकणातील रत्नागिरी, रायगड आणि सिंधुदुर्ग जिल्ह्यांमध्ये आज हलक्या सरी आणि ढगाळ हवामान दिसून येईल. रत्नागिरीमध्ये दुपारनंतर थोडा पाऊस होऊ शकतो, मात्र जोरदार पावसाची शक्यता नाही. तापमान 24 ते 25°C दरम्यान राहील. समुद्रसपाटीवर आर्द्रता जास्त असल्याने दमट हवामान अनुभवता येईल.