Mumbai Rain: काळजी घ्या! मुंबई, ठाण्यात पुन्हा मुसळधार, कोकणात धोक्याचा इशारा, आजचा हवामान अंदाज

राज्यात पावसाचा जोर कायम आहे. विशेषतः कोकण किनारपट्टीपासून मुंबईपर्यंत अनेक जिल्ह्यांत हवामान खात्याकडून यलो आणि ऑरेंज अलर्ट जारी केला आहे. मुसळधार पावसामुळे मुंबई, ठाण्यातील प्रवाशांची चांगलीच तारांबळ उडतेय. तर कोकण किनारपट्टीवरील जिल्ह्यांतील नागरिकांनी देखील काळजी घेण्याची गरज आहे.

सलग दोन दिवस मुंबईकरांना मुसळधार पावसाचा सामना करावा लागतोय. पुढील काही दिवस मुंबईत पावसाची तीव्रता कायम असणार आहे. आज म्हणेजच 23 जुलै रोजी मुंबईतील काही ठिकाणी मुसळधार ते अती मुसळधार पावसाची शक्यता वर्तवण्यात आली आहे. हवामान विभागाने पुन्हा एकदा यलो अलर्ट दिला असून सकाळपासूनच शहरात ढगाळ वातावरण आहे. दुपारनंतर पावसाचा जोर वाढू शकतो.

ठाणे आणि नवी मुंबईत पावसामुळे लोकल प्रवाशांची तारांबळ उडतेय. आजही नवी मुंबई आणि ठाणे या दोन्ही शहरी भागांमध्ये मुसळधार पावसाचा इशारा देण्यात आला आहे. हवामान खात्याने येथेही यलो अलर्ट दिला असून, ढगाळ वातावरणासह अधूनमधून पावसाच्या सरी येण्याची शक्यता आहे. दोन्ही शहरांत काही भागांत पाणी तुंबण्याची शक्यता असल्याने नागरिकांनी घराबाहेर पडताना खबरदारी घ्यावी.

पालघरमध्ये जोरदार वादळी वाऱ्यासह पाऊस सुरू आहे. आजही पालघर जिल्ह्यात एक-दोन ठिकाणी जोरदार पाऊस होण्याची शक्यता वर्तवण्यात आली आहे. येथे देखील यलो अलर्ट आहे. ग्रामीण व किनारी भागांत वाऱ्याचा जोर जाणवू शकतो. मासेमारीवर निर्बंध शक्य असून नागरिकांनी स्थानिक प्रशासनाच्या सूचनांचे पालन करावे.

कोकणात शेतकऱ्यांची भात लावणी सुरू आहे. सतत पाऊस असल्यामुळे शेतकरी खूश आहेत. पण सिंधुदुर्ग, रत्नागिरी आणि रायगडला आजही ऑरेंज अलर्ट असून अति मुसळधार पावसाचा इशारा देण्यात आला आहे. विशेषतः सिंधुदुर्गमध्ये काही भागांत अती मुसळधार पावसाची शक्यता आहे. या भागात दरड कोसळण्याचा धोका व झाडे कोसळण्याची शक्यता लक्षात घेता नागरिकांनी योग्य ती काळजी घ्यावी.