Ajay Baraskar : '...म्हणून जरांगेंनी लोकसभेबद्दल तो निर्णय घेतला', बारस्करांचा मोठा गौप्यस्फोट

अजय बारस्कर यांनी आज पत्रकार परिषद घेऊन पुन्हा एकदा मराठा आंदोलक मनोज जरांगे पाटील यांच्यावर जोरदार हल्लाबोल केला आहे. त्यांनी जरांगे पाटील यांच्यावर गंभीर आरोप केले आहेत.

परवाच्या बैठकीला जे सच्चे मराठे गेले होते, त्या लोकांनी जरांगे यांना शिव्या घातल्या आहेत. अशोक चव्हाण हे परवा रात्री तिकडे गेले जरांगे यांना भेटले आणि माध्यमांना प्रतिक्रियाही दिली. अशोक चव्हाण यांच्या भेटीवेळी काय चर्चा झाली? त्याचं रेकॉर्डिंग जगासमोर आणा, असं आव्हान बारस्कर यांनी जरांगे पाटील यांना केलं आहे.

मनोज जरांगे यांची अशोक चव्हाण यांच्या सोबत डील झाली आहे, एकेक मराठा अपक्ष उमेदवार उभा करण्याची पहिली डील झाली आणि आता मविआसोबत दुसरी डील सूरू आहे. मविआचा उमेदवार असेल तिथे उमेदवार उभा करणार नाही ही दुसरी डील सुरू असल्याचा दावा बारस्कर यांनी केला आहे

पुढे बोलताना बारस्कर यांनी मनोज जरांगे पाटील यांच्यावर जोरदार हल्लाबोल केला आहे, तुम्ही आता फडणवीस साहेब फडणवीस साहेब म्हणायला लागले आहात. एसआयटी चौकशीला घाबरलात. म्हणून तुम्ही अशोक चव्हाण यांना शरण गेलात असा हल्लाबोल बारस्कर यांनी केला आहे.

मनोज जारांगे यांची लढाई गोरगोरीब मराठ्यांसाठी आणि लेकराबाळांसाठी नव्हती, तर ज्यांना ओबीसीच्या कोट्यातून सरपंच व्हायचं होतं. त्यांच्यासाठी जरांगे यांची ही लढाई होती, असं बारस्कर यांनी म्हटलं आहे.

त्यांनी जे काही सुरू केलं त्यानंतर मराठा तरुणांवर गुन्हे दाखल झाले, ओबीसी आणि मराठा समाजात भांडण लावली गेली असा आरोपही त्यांनी यावेळी केला.

वाशीमध्ये ज्यादिवशी मुख्यमंत्र्यांच्या हस्ते ज्यूस पिऊन उपोषण सोडलं, त्याच्या आदल्या दिवशी मटण खाल्लं असंही बारस्कर यांनी म्हटलं आहे.