7 पुणेकरांची सायकलवारी, 8 दिवसांत गाठली कन्याकुमारी

  <a href="https://news18marathi.com/pune/">पुण्यातील</a> इंडो ॲथलेटिक्स सोसायटीच्या सात सायकलपटूंनी पुणे ते कन्याकुमारी अंतर सायकलवरून पार केले. केवळ 8 दिवसांत 1600 किलोमीटरचे अंतर पार करत त्यांनी आपली मोहीम पूर्ण केली.

या सायकलपटूंनी आपल्या मोहिमेची सुरुवात इंडो अथेलेटिक सोसायटीच्या पुण्यातील कार्यालयापासून केली. पुण्याहून निघाल्यापासून कागल येथे 265 किलोमीटरचा पहिला टप्पा होता.

कागलपासून बेळगाव मार्गे येल्लापुर पर्यंत 225 किलोमीटरचा दुसरा टप्पा, त्यानंतर गोकर्ण महाबळेश्वर दर्शन घेऊन मुरूडेश्वर येथे 200 किलोमीटरचा तिसरा टप्पा पूर्ण केला.

मुरुडेश्र्वर ते उडपीपर्यंतचा चौथा टप्पा, तेथून कुन्नुर पर्यंतचा 175 किलोमीटरचा पाचवा टप्पा आणि त्यानंतर थालसेरी मार्गे दक्षिण द्वारका म्हणून ओळखले जाणारे गुरुवायूरपर्यंत 180 किलोमीटरचा सहावा टप्पा पार केला.

सातव्या दिवशी समुद्रकिनारा अनुभव घेत आलप्पी येथे 150 किलोमीटर अंतर कापले. त्यानंतर थिरूअनंतपुरम येथे स्वामी पद्मनाभ दर्शन घेऊन कन्याकुमारी येथे स्वामी विवेकानंद स्मारक या ठिकाणी शेवटचा टप्पा पार केला.

यामध्ये सर्वांनी अगोदर पासून नियमित व्यायाम व सायकलिंगचा सराव केला. कोणत्या अडचणी येऊ शकतात आणि त्यावर कशी मात करायची याची तयारी खूपच अगोदर पासून करण्यात आली.

सर्व टीम मेंबरनी पूर्णपणे सहकार्य केल्यामुळे ही मोहीम यशस्वी रित्या पूर्ण करू शकलो, असे मोहिमेचे प्रमुख युवराज पाटील यांनी सांगितले.