Weather Alert: उत्तरेकडून आलंय संकट! पुणे, सोलापूरला ‘कोल्ड वेव्ह’चा अलर्ट, 24 तास धोक्याचे!

बंगालच्या उपसागरातील 'डिटवाह' चक्रीवादळ निवळून गेले. अशातच उत्तरेकडील थंड वाऱ्यांचे प्रवाह धडकत असल्याने मध्य महाराष्ट्रात थंडीची लाट कायम आहे. आज 2 डिसेंबर रोजी राज्यात अंशतः ढगाळ हवामानासह हुडहुडी कायम राहण्याचा अंदाज आहे. तर मध्य महाराष्ट्रात थंडीच्या लाटेची शक्यता असल्याने सतर्कतेचा यलो अलर्ट हवामान विभागाने दिला आहे.

आज मंगळवारी पुणे येथे कोल्ड वेव्हचा इशारा देण्यात आला आहे. तर पुण्यातील किमान तापमान 10 अंश सेल्सिअसपर्यंत खाली येईल. यामुळे पुणेकरांना असामान्य गारठा जाणवेल. तेथील कमाल तापमान 28 अंश सेल्सिअस तर किमान तापमान 10 अंश सेल्सिअस इतके राहील. पुणे घाटमाथा परिसरात देखील शीत लहरींचा अंदाज असून यलो अलर्ट जारी करण्यात आला आहे.

सातारा जिल्ह्यात गारठा वाढत आहे. सोमवारी साताऱ्यातील कमाल तापमानाचा पारा 28.7 अंशावर राहिला. तर 11.9 अंश सेल्सिअस किमान तापमान राहिले. आज सातारा जिल्ह्यात किमान आणि कमाल तापमान 11 ते 29 अंश सेल्सिअस दरम्यान राहील.

कोल्हापूर जिल्ह्यात अंशत ढगाळ हवामानासह कमाल तापमानाचा पारा 15 अंशावर राहील. तसेच किमान तापमानाचा पारा 30 अंशापर्यंत राहील. आज दुपारनंतर अंशतः ढगाळ वातावरण होवून गारठा कमी राहण्याची शक्यता हवामान विभागाकडून वर्तवण्यात आली आहे.

सोमवारी सोलापूर जिल्ह्यातील कमाल तापमान 31.8 अंश आणि किमान तापमान 16 अंश सेल्सिअस नोंदविण्यात आले. आज सोलापुरात थंडीच्या लाटेचा इशारा देण्यात आला असून तापमानात चढ-उतार जाणवेल. कमाल तापमानाचा पारा 32 अंशावर राहील. तसेच किमान तापमानाचा पारा 14 अंशापर्यंत घसरण्याची शक्यता आहे.

सांगली जिल्ह्यात मागील 24 तासात 15.1 अंश सेल्सिअस किमान तापमानाची नोंद झाली. आज जिल्ह्यात कमाल तापमान 30 अंशावर राहील. तसेच किमान तापमान 13 अंशावर राहील. त्यामुळे थंडीचा कडाका वाढणार असून पुढील काही दिवस हीच स्थिती राहणार आहे.

पश्चिम महाराष्ट्रातील पुणे आणि सोलापूर जिल्ह्यात थंडीची लाट येण्याची शक्यता असल्याने सतर्कतेचा यलो अलर्ट हवामान विभागाने दिला आहे. उर्वरित जिल्ह्यांत गारठा कायम राहून पहाटे धुक्यासह दव तर दिवसभरच्या वातावरणात थंडी राहील. तसेच राज्यातील काही ठिकाणी पारा 10 अंशाच्या खाली घसरल्याने हुडहुडी वाढली आहे. यामुळे नागरिकांनी योग्य ती काळजी घ्यावी.