Weather Alert: उत्तरेत थंडीची लाट, पश्चिम महाराष्ट्रातही हवा बदलली, पुणे ते सोलापूर आजचं अपडेट

उत्तरेकडील शीत वाऱ्यांमुळे उत्तर महाराष्ट्रात थंडीची लाट कायम आहे. राज्याच्या किमान तापमानात 2 ते 8 अंशांची मोठी घट झाल्याने हुडहुडी वाढली आहे. आज 13 नोव्हेंबर रोजी राज्यातील हवामान मुख्यतः कोरडे राहणार आहे. उत्तरेकडे थंडी कायम राहण्याची तर दक्षिणेकडे किमान तापमानात काही अंशी वाढ होण्याची शक्यता हवामान विभागाने वर्तविली आहे.

पुणे जिल्ह्यात बुधवारी 30 कमाल आणि 13.7 अंश सेल्सिअस किमान तापमानाचा पारा नोंदविण्यात आला. आज जिल्ह्यातील कमाल तापमान 30 अंशावर राहिल. तसेच किमान तापमान पारा 14 अंशापर्यंत घटणार असल्याने पुण्यात थंडीची हुडहुड कायम राहण्याची शक्यता हवामान विभागाकडून वर्तवण्यात आली आहे.

साताऱ्यात गारठा वाढत असून धुक्यासह दव पडत आहेत. बुधवारी साताऱ्यातील कमाल तापमानाचा पारा 30.7 अंशावर राहिला. तर 15 अंश सेल्सिअस किमान तापमान राहिले. आज सातारा जिल्ह्यात किमान आणि कमाल तापमानात अंशत वाढ होऊन 15 ते कमाल 32 अंश सेल्सिअस दरम्यान राहील.

कोल्हापूरमध्ये दिवसाची सुरुवात साधारण 15 अंश सेल्सिअस किमान तापमानाने होईल. जसजसा दिवस पुढे जाईल तसतसे कमाल तापमान 30 अंश सेल्सिअसवर जाण्याची शक्यता आहे. सकाळी थंडी तर दुपारी उन्हाचा चटका आणि उकाडा अशी स्थिती अनुभवायला मिळत आहे.

सोलापूर जिल्ह्यात कमाल तापमानात अंशत चढ-उतार होत आहे. बुधवारी 32.8 अंश सेल्सिअस कमाल तापमानाची नोंद झाली. आज अंशत: वाढ होऊन पारा 33 अंशावर राहिल. मात्र किमान तापमानाचा पारा 16 अंशापर्यंत घसरता राहील. सोलापूरमध्ये दुपारच्या वेळी उन्हाचा चटका कायम आहे.

सांगली जिल्ह्यात मागील 24 तासात 31.2 अंश सेल्सिअस कमाल तापमानाची नोंद झाली. आज जिल्ह्यात दिवसभर निरभ्र आकाशासह कमाल तापमान 30 अंशावर राहील. तसेच किमान तापमान 15 अंशावर राहील. सांगलीत पहाटे थंडीचा कडाका आणि दुपारी उन्हाचा चटका अशी स्थिती राहील.

राज्यात गारठा वाढत असून, पहाटे धुक्यासह दव पडल्याचे चित्र कायम आहे. पश्चिम महाराष्ट्रातील काही जिल्ह्यांत किमान तापमानात चढ-उतार होत आहेत. मात्र थंडीचा कडाका कायम राहण्याची शक्यता हवामान विभागाने वर्तविली आहे. पहाटे थंडी, दुपारी कडक ऊन आणि रात्री परत गारठा जाणवत असल्याने नागरिकांनी आरोग्याची काळजी घ्यावी.