Weather Alert: पुणे ते कोल्हापूर धो धो पाऊस, सोलापुरात मात्र वेगळेच चित्र, आजचा हवामान अंदाज

राज्यात मान्सूनचा जोर वाढला असून कोकण, घाटमाथ्यासह विदर्भात जोरदार पाऊस सुरू आहे. 8 जुलै रोजी राज्यातील 25 जिल्ह्यांत पावसाचा इशारा देण्यात आला आहे. पश्चिम महाराष्ट्रात देखील पावसाची रिपरिप सुरूच असून पुणे ते कोल्हापूर घाटमाथ्याच्या भागात जोर अधिक आहे. पुढील 24 तासांचा हवामान अंदाज जाणून घेऊ.

सातारा जिल्ह्यात मागील 24 तासात जोरदार पाऊस कोसळला. सातारा परिसरामध्ये 9 मिलिमीटर पावसाची नोंद झाली. पुढील 24 तासात साताऱ्यातील कमाल तापमान 27 अंश सेल्सिअस राहिल. आज ढगाळ आकाशासह मध्यम पावसाची शक्यता हवामान विभागाने वर्तवली आहे. घाटमाथ्यावर मात्र मुसळधार पाऊस सुरु असून पुढील 24 तासांसाठी ऑरेंज अलर्ट देण्यात आला आहे.

पुणे जिल्ह्यात पावसाचा जोर अधिक राहिला. धरणक्षेत्रात पावसाचा जोर पुन्हा वाढला आहे. तर घाटमाथ्यावर जोरदार पाऊस कोसळत आहे. मागील 24 तासात पुण्याच्या शिवाजीनगर परिसरात 8.9 मिलिमीटर पावसाची नोंद झाली. यावेळी कमाल तापमान 28.6 अंश सेल्सिअस राहिले. पुढील 24 तासात पुणे घाटमाथ्यावर मुसळधार पाऊस असून दक्षतेचा येलो अलर्ट देण्यात आला आहे.

कोल्हापूर जिल्ह्यात पावसाची तीव्रता कायम आहे. कोल्हापूर परिसरात 8 मिलीमीटर पाऊस नोंदविण्यात आला. यावेळी कमाल तापमानात घट नोंदविण्यात आली. कमाल तापमान 26.6 अंश सेल्सिअस राहिले. पुढील 24 तासात कमाल तापमान 27 अंशावर स्थिर राहील. तसेच कोल्हापूर घाटमाथ्यावर मुसळधार पावसाची शक्यता असल्याने सतर्कतेचा येलो अलर्ट देण्यात आला आहे.

सोलापूर जिल्हात पावसाची उघडीप कायम असून जिल्ह्यातील कमाल तापमान वाढ होत आहे. मागील 24 तासात राज्यातील उच्चांकी 33.7 अंश तापमानाची नोंद सोलापूर मध्ये झाली. पुढील 24 तासात कमाल तापमानाचा पारा 33 अंशावर राहणार असून तुरळक ठिकाणी हलक्या पावसाची शक्यता आहे.

मागील 24 तासात सांगली जिल्ह्यात 3 मिलिमीटर पावसाची नोंद झाली. आज सांगली जिल्ह्यात ढगाळ आकाशासह मध्यम पावसाचा अंदाज आहे. यावेळी कमाल तापमान 29 तर किमान तापमान 22 अंश सेल्सिअस इतके राहील.

पश्चिम महाराष्ट्रातील सर्वच जिल्ह्यांत आकाश पूर्णतः ढगाळ राहील. तसेच वाऱ्यांचा वेग ताशी 22 ते 30 किमी इतका राहण्याची शक्यता आहे. सातारा, पुणे आणि कोल्हापूर घाट परिसरात अतिवृष्टी तसेच जिल्हाअंतर्गत परिसरात हलका ते मध्यम स्वरूपाचा पाऊस राहील. त्यामुळे शेतकरी आणि नागरिकांना योग्य ती काळजी घ्यावी लागेल.