Weather Alert: राज्यात पावसाची उघडीप, पण पश्चिम महाराष्ट्रात वेगळीच स्थिती, आज पुन्हा धो धो कोसळणार

राज्यातील काही भागांत पावसाचा जोर कमी झाला आहे. मात्र, पश्चिम महाराष्ट्रात पावसाची संततधार सुरूच आहे. प्रामुख्याने घाटमाथ्यावर पावसाचा जोर अधिक आहे. मागीव 24 तासात ताम्हिणी, शिरगाव घाटमाथ्यावर सर्वाधिक 175 मिलिमीटर पाऊस पडल्याची नोंद झाली. या पावसामुळे अजूनही धरणात पाण्याची आवक वेगाने सुरू असून पश्चिम महाराष्ट्रतील अनेक धरणांतून पाण्याचा विसर्ग सोडल्याने नद्या दुथडी भरून वाहत आहेत. त्यामुळे नदीकाठच्या गावांना दक्षतेचा इशारा देण्यात आला आहे.

पुणे जिल्ह्यात पावसाचा जोर कमी झाला आहे. घाटमाथ्यावर आणि धरणक्षेत्रात पावसाची संततधार सुरू आहे. मागील 24 तासात पुणे जिल्ह्यात 6 मिलीमीटर पाऊस नोंदविण्यात आला. यावेळी कमाल तापमानाचा पारा 27.1 अंश सेल्सिअसवर होता. पुढील 24 तासात पुणे घाटमाथ्यावर जोरदार पावसाची शक्यता असल्याने सतर्कतेचा यलो अलर्ट दिला आहे. तसेच उर्वरित पुणे जिल्ह्यात हलक्या पावसाचा अंदाज हवामान विभागाकडून वर्तवण्यात आला आहे.

सातारा जिल्ह्यात मागील 24 तासात मध्यम पाऊस झाला. सातारा परिसरामध्ये 12 मिलिमीटर पावसाची नोंद झाली. पुढील 24 तासात सातारा घाटमाथ्यावर जोरदार पावसाची शक्यता असल्याने दक्षतेचा यलो अलर्ट जारी केला आहे.

कोल्हापूर जिल्ह्यात गेल्या 24 तासात 3 मिलीमीटर पावसाची नोंद झाली. यावेळी कमाल तापमान 25.2 अंश सेल्सिअस राहिले. पुढील 24 तासात कमाल तापमान 26 अंशावर राहील. कोल्हापूर जिल्ह्यात पावसाची उघडझाप सुरू आहे. तर धरणक्षेत्रात पाऊस सुरूच असल्याने नद्यांच्या पाणीपातळीत वाढ असली तरी वाढीची गती कमी झाली आहे.

सोलापूर जिल्हात मागील 24 तासात 0.2 मिलीमीटर पावसाची नोंद झाली. यावेळी कमाल तापमानाचा पारा 31.3 अंशावर राहिला. पुढील 24 तासात कमाल तापमान 30 अंशावर राहण्याची शक्यता आहे. तसेच सोलापूर जिल्ह्यात हलक्या पावसाची शक्यता कायम आहे.

गेल्या 24 तासात सांगली जिल्ह्यामध्ये 5 मिलीमीटर पावसाची नोंद झाली. पुढील 24 तासात ढगाळ आकाशासह हलक्या पावसाची शक्यता हवामान विभागाने वर्तवली आहे. यावेळी जिल्ह्यातील कमाल तापमान 28 तर कमान तापमान 21 अंश सेल्सिअस इतके राहील.

पश्चिम महाराष्ट्रातील हवामानात सातत्याने बदल जाणवत आहेत. राज्यातील पावसाचा जोर ओसरला असला तरी पश्चिम महाराष्ट्रातील घाट भागात जोरदार पावसाचा इशारा कायम आहे. त्यामुळे नागरिकांना योग्य ती काळजी घ्यावी लागेल.