Weather Alert: महिनाअखेर बदलली हवा, पश्चिम महाराष्ट्रातून मोठं अपडेट, आजचा हवामान अंदाज

राज्यातील काही भागात पावसाचा जोर कमी झाला आहे. मात्र, पश्चिम महाराष्ट्रात पावसाची संततधार सुरूच आहे. घाटमाथ्यावर पावसाचा जोर अधिक आहे. आज 30 जुलै रोजी संपूर्ण विदर्भासह कोकण, घाटमाथ्यावर तुरळक ठिकाणी जोरदार सरींची शक्यता असल्याने सतर्कतेचा यलो अलर्ट हवामान विभागाने दिला आहे. उर्वरित राज्यात ऊन सावल्यांच्या खेळात हलक्या सरींची शक्यता आहे.

पुणे जिल्ह्यात पावसाचा जोर कमी झाला आहे. घाटमाथ्यावर आणि धरणक्षेत्रात पावसाची संततधार सुरू आहे. मागील 24 तासात पुणे जिल्ह्यात 2.1 मिलीमीटर पाऊस नोंदविण्यात आला. यावेळी कमाल तापमानाचा पारा 27.5 अंश सेल्सिअसवर होता. पुढील 24 तासात पुणे घाटमाथ्यावर जोरदार पावसाची शक्यता असल्याने सतर्कतेचा यलो अलर्ट हवामान विभागाने दिला आहे. तसेच उर्वरित पुणे जिल्ह्यात हलक्या पावसाचा अंदाज आहे.

सातारा जिल्ह्यात मागील 24 तासात मध्यम पाऊस कोसळला. सातारा परिसरामध्ये 5 मिलिमीटर पावसाची नोंद झाली. पुढील 24 तासात साताऱ्यातील कमाल तापमान 25.6 अंश सेल्सिअस राहिले. सातारा घाटमाथ्यावर जोरदार पावसाची शक्यता असल्याने सतर्कतेचा यलो अलर्ट दिला आहे.

कोल्हापूर जिल्ह्यात मागील 24 तासात 6 मिलीमीटर पावसाची नोंद झाली. यावेळी कमाल तापमान 24.9 अंश सेल्सिअस नोंदवले. पुढील 24 तासात कमाल तापमान 25 अंशावर राहिल. कोल्हापूर जिल्ह्यात पावसाची उघडीप राहिली. धरणक्षेत्रात पाऊस सुरूच असल्याने नद्यांच्या पाणीपात्रात वाढ असली तरी वाढीची गती कमी झाली आहे.

सोलापूर जिल्हात मागील 24 तासात पावसाची उघडीप राहिली. यावेळी कमाल तापमानाचा पारा 31.8 अंशावर राहिला. पुढील 24 तासात कमाल तापमान 32 अंशावर राहण्याची शक्यता आहे. तसेच सोलापूर जिल्ह्यात हलक्या पावसाची शक्यता कायम आहे.

गेल्या 24 तासात सांगली जिल्ह्यामध्ये 3 मिलीमीटर पावसाची नोंद झाली. पुढील 24 तासात ढगाळ आकाशासह हलक्या पावसाची शक्यता हवामान विभागाने वर्तवली आहे. यावेळी जिल्ह्यातील कमाल तापमान 28 तर कमान तापमान 22 अंश सेल्सिअस इतके राहील.

पश्चिम महाराष्ट्रातील हवामानात महिनाअखेर मोठे बदल जाणवत आहेत. श्रावणात पावसाचा जोर ओसरला असून काही ठिकाणी तुरळक सरी बरसत आहेत. पुढील काही काळ हवामानाची हीच स्थिती कायम राहण्याचा अंदाज आहे. वातावरणातील बदलांमुळे आरोग्याची काळजी घ्यावी लागेल.