Maharashtra Weather Alert: छत्री सोबत ठेवा, श्रावणात फसवा पाऊस, पुणे ते कोल्हापूर आजचा हवामान अंदाज

राज्यातील पावसाचा जोर ओसरला असला तरी, काही ठिकाणी ऊन सावल्यांच्या खेळात श्रावण सरी कोसळत आहेत. आज 31 जुलै रोजी विदर्भात विजांसह जोरदार पवसाची शक्यता असल्याने हवामान विभागाने दक्षतेचा इशारा दिला आहे. तसेच उर्वरित राज्यात ढगाळ आकाशासह तुरळक ठिकाणी हलक्या सरींची शक्यता आहे. पश्चिम महाराष्ट्रातील हवामान अंदाज जाणून घेऊ.

पुणे जिल्ह्यात पावसाचा जोर कमी झाला आहे. घाटमाथ्यावर आणि धरणक्षेत्रात देखील पावसाने विश्रांती घेतली आहे. मागील 24 तासात पुणे जिल्ह्यात 2.8 मिलीमीटर पाऊस नोंदविण्यात आला. यावेळी कमाल तापमानाचा पारा 26.5 अंश सेल्सिअस होते. पुढील 24 तासात संपूर्ण पुणे जिल्ह्यात हलक्या पावसाची शक्‍यता असून कमाल तापमान 29 तर किमान तापमान 22 अंश सेल्सिअस इतके राहील.

सातारा जिल्ह्यात मागील 24 तासात 7 मिलिमीटर पावसाची नोंद झाली. पुढील 24 तासात साताऱ्यातील कमाल तापमान 27 अंश सेल्सिअस राहील. सातारा जिह्यात रिमझिम सरिंची शक्यता हवामान विभागाने व्यक्त केली आहे.

कोल्हापूर जिल्ह्यात मागील 24 तासात 9 मिलीमीटर पावसाची नोंद झाली. यावेळी कमाल तापमान 26.1 अंश सेल्सिअस राहिले. पुढील 24 तासात कमाल तापमान 26 अंशावर राहील. तर आज दिवसभर हलक्या सरी बरसतील.

सोलापूर जिल्हात गेल्या 24 तासात पावसाची उघडीप राहिली. मात्र राज्यातील उच्चांकी 31.8 अंश सेल्सिअस तापमानाची नोंद झाली. पुढील 24 तासात कमाल तापमान 33 अंशावर राहण्याची शक्यता आहे. तसेच सोलापूर जिल्ह्यात हलक्या पावसाची शक्यता कायम आहे.

सांगली जिल्ह्यामध्ये बुधवारी 2 मिलीमीटर पावसाची नोंद झाली. पुढील 24 तासात ढगाळ आकाशासह हलक्या पावसाची शक्यता हवामान विभागाने वर्तवली आहे. यावेळी जिल्ह्यातील कमाल तापमान 29 तर किमान तापमान 22 अंश सेल्सिअस इतके राहील.

जुलैच्या अखेरीस राज्यात पावसाने जोमदार हजेरी लावली. त्यानंतर पुन्हा पावसाने उघडीप दिली असून राज्यात ऊन सावल्यांचा खेळ सुरू आहे. त्यामुळे धरणांतून पाण्याचा विसर्ग कमी होत असून पश्चिम महाराष्ट्रातील नदीकाठच्या गावांना दिलासा मिळाला आहे.