Weather Alert: महाराष्ट्रावर नवीन संकट, हवामान विभागाने स्पष्ट सांगितलं

गेल्या 3 दिवसांत राज्यात विविध भागांतील तापमानात वाढ होताना दिसून येत आहे. विदर्भातील तापमान 44 अंश सेल्सिअसपर्यंत पोहोचले असल्याने तेथील नागरिकांना उन्हाचा त्रास सहन करावा लागत आहे. 8 एप्रिलसाठी विदर्भातील काही जिल्ह्यांना हीट वेव्हचा इशारा देण्यात आला आहे. त्याचबरोबर मुंबई, पुणे आणि नाशिकमधील तापमानात देखील वाढ झालेली दिसून येत आहे.

कोकण विभागात 8 एप्रिलला उष्ण आणि दमट वातावरण असण्याची शक्यता हवामान विभागाने वर्तवली आहे. मुंबईतील तापमानात 2 अंशांनी वाढ झालेली दिसून येत आहे. 8 एप्रिलला तेथील कमाल तापमान 37 अंश सेल्सिअस तर किमान तापमान 24 अंश सेल्सिअस इतके असण्याची शक्यता आहे. त्याठिकाणी मुख्यतः निरभ्र आकाश असू शकते.

पुण्यातील कमाल तापमान 40 अंश सेल्सिअस तर किमान तापमान 18 अंश सेल्सिअस इतके असण्याची शक्यता आहे. 8 एप्रिलला पुण्यात मुख्यतः निरभ्र आकाश राहून दुपार किंवा सायंकाळनंतर अंशतः ढगाळ वातावरण निर्माण होण्याची शक्यता असल्याचे हवामान विभागाने सांगितले आहे. पुण्यातील तापमानात देखील अंशतः वाढ झालेली दिसून येत आहे.

मराठवाड्यातील प्रमुख शहर असलेल्या छत्रपती संभाजीनगरमधील कमाल तापमान 41 अंश सेल्सिअस तर किमान तापमान 24 अंश सेल्सिअस इतके असण्याची शक्यता आहे. 8 एप्रिलला त्याठिकाणी अंशतः ढगाळ आकाश राहून मेघगर्जनेसह विजांचा कडकडाट होण्याची शक्यता असल्याची माहिती हवामान विभागाने दिली आहे.

उत्तर महाराष्ट्रातील प्रमुख शहर असलेल्या नाशिकमधील तापमानात अंशतः वाढ झालेली दिसून येत आहे. तेथील कमाल तापमान 41 अंश सेल्सिअस तर किमान तापमान 19 अंश सेल्सिअस इतके असण्याची शक्यता आहे. 8 एप्रिलला त्याठिकाणी मुख्यतः निरभ्र आकाश असू शकते.

सर्वाधिक तापमान वाढ ही विदर्भातील जिल्ह्यांत झालेली दिसून येत आहे. 8 एप्रिलला नागपूरमधील कमाल तापमान 42 अंश सेल्सिअस तर किमान तापमान 23 अंश सेल्सिअस इतके असण्याची शक्यता आहे. त्याठिकाणी अंशतः ढगाळ वातावरण असू शकते. सर्वात महत्त्वाचे म्हणजे विदर्भातील अकोला आणि यवतमाळ या दोन जिल्ह्यांना 8 एप्रिलला हीट वेव्हचा इशारा हवामान विभागाकडून देण्यात आला आहे. नागपूरला सुद्धा पुढील 24 तासांत हीट वेव्हचा इशारा हवामान विभागाकडून देण्यात आला आहे.

राज्यातील तापमानात दिवसेंदिवस वाढ होताना दिसून येत आहे. विदर्भातील तापमानात चांगलीच वाढ झालेली दिसून येत आहे. त्यामुळे येथील नागरिकांनी घराच्या बाहेर पडताना काळजी घेणे आवश्यक आहे. त्याचबरोबर दमट वातावरण असलेल्या भागात आरोग्याच्या समस्या उद्भवू शकतात. तेथील नागरिकांनी सुद्धा सावधगिरी बाळगणे गरजेचे आहे.