IND vs USA : 'सूर्या आम्ही येतोय...', युएसएच्या कॅप्टनने मराठीत दिली सुर्यकुमार यादवला वॉर्निंग!

सूर्या मॅजिक करायला आम्ही येतोय... असं म्हणत युएसएचा कॅप्टन हरमीत सिंग याने सूर्यकुमार यादवला वॉर्निंग (Harmeet Singh To Suryakumar Yadav) दिली आहे. मी काय बोललो ते सूर्याला समजेल. आम्ही दोघांनी रणजी ट्रॉफीचा डेब्यू एकत्र केला होता. एका सिझनचा घालमेल असेल. पण डेब्यू करणारे आम्ही पहिले होते. त्यानंतर तो आमचा अंडर 19 मध्ये कॅप्टन होता, असं हरमीत सिंगने म्हटलं आहे.

वानखेडेवर खेळणं नेहमीच खास राहिले आहे. मुंबईत लहानाचा मोठा झाल्यामुळे आणि माझ्या आयुष्यातील पहिली 27 वर्षे मुंबईतच क्रिकेट खेळल्यामुळे, मुंबईत परत येऊन वानखेडेवर सामना खेळणे, त्यातही विश्वचषकाचा सामना खेळणं, माझ्यासाठी खूप महत्त्वाचं आहे, असंही हरमीत सिंग म्हणाला. त्यावेळी त्याने युएसए संघाच्या रणनितीवर विचार देखील मांडले.

दरम्यान, टीम इंडिया एक बलाढ्य संघ आहे. गेल्या वर्षी (स्पर्धेत) आम्ही ज्या प्रकारचा क्रिकेट खेळलो होतो, तोच खेळ पुन्हा एकदा सादर करण्याची आमची योजना आहे. आम्हाला कोणत्याही संघाला श्रेष्ठ मानायचं नाही, असं युएसएच्या कॅप्टनने म्हटलं होतं. गेल्या स्पर्धेत अमेरिका संघाने माजी विजेत्या पाकिस्तानला धक्का दिला होता आणि भारतासमोरही प्रभावी खेळ करत सुपर एटमध्ये स्थान मिळवलं होतं.

हरमीत सिंग हा स्लो लेफ्ट-आर्म ऑर्थोडॉक्स स्पिनर आणि मिडल ऑर्डर बॅटर म्हणून ओळखला जातो. त्याने आपल्या क्रिकेट करिअरची सुरुवात भारतात केली होती आणि तो 2012 चा अंडर-19 विश्वचषक जिंकणाऱ्या भारतीय टीमचा भाग होता. भारतातील घरगुती क्रिकेटमध्ये हरमीतने मुंबई आणि त्रिपुरा या टीम्सचे प्रतिनिधित्व केले आहे. मात्र, अधिक चांगल्या संधींच्या शोधात त्याने 2020 मध्ये अमेरिकेत स्थलांतर केलं. तिथं त्याने मायनर लीग क्रिकेट आणि मेजर लीग क्रिकेटमध्ये (MLC) आपली छाप पाडली. तो सिएटल थंडरबोल्ट्स टीमचा कॅप्टन होता आणि सिएटल ऑर्कस या टीमसाठीही त्याने चांगली कामगिरी केली आहे.