Weather Alert: पुढील 12 तास महत्त्वाचे, महाराष्ट्रात उष्णतेच्या लाटेचं संकट, हवामान खात्याचा अलर्ट

महाराष्ट्रातील उष्णतेचा पारा वाढण्यास सुरुवात झाली आहे. 4 मार्च रोजी उष्ण आणि दमट हवामान राहण्याची शक्यता असून कमाल तापमानात लक्षणीय वाढ झाल्याचे पाहायला मिळेल. विदर्भातील अकोल्यात 38 अंशांपर्यंत तापमान नोंदवले गेले असून, तीव्र उन्हाचा तडाखा आजही जाणवेल. त्यामुळे उष्णतेच्या लाटेच्या पूर्वसूचनांमुळे सावध राहण्याचा इशारा हवामान खात्याकडून देण्यात आला आहे.

मुंबई, ठाणे, रायगड, रत्नागिरी, सिंधुदुर्गमध्ये उष्ण आणि दमट हवामान राहण्याची शक्यता आहे. मुंबईत कमाल 33-37 अंश सेल्सियस, किमान 22-22 अंश राहण्याची शक्यता हवामान खात्याने वर्तवली आहे. आर्द्रता जास्त असल्याने उकाडा तीव्र जाणवेल. त्यामुळे नागरिकांनी योग्य ती काळजी घ्यावी. आज मुंबई, ठाणे, पालघर आणि रायगड जिल्ह्याला उष्णतेचा यलो अलर्ट हवामान खात्याने दिला आहे.

पश्चिम महाराष्ट्रातील पुणे, सातारा, सांगली, कोल्हापूरमध्ये कोरडे आणि उष्ण हवामान राहण्याची शक्यता आहे. पुण्यात कमाल 32-35 अंश, किमान 16-19 अंश राहण्याची शक्यता आहे.

उत्तर महाराष्ट्रातील नाशिक, धुळे, जळगाव, नंदुरबार आजही तापमान वाढ पाहायला मिळेल. नाशिकमध्ये दिवसा 32-36 अंश, रात्री 18-21 अंश तापमान राहील.

मराठवाड्यातील छत्रपती संभाजीनगर, जालना, बीड, लातूर, नांदेड, परभणी आणि धाराशिवमध्ये उष्ण आणि कोरडे हवामान पाहायला मिळेल. कमाल 34-37 अंशांपर्यंत तापमान राहील, किमान 19-22 अंश राहील.

विदर्भातील नागपूर, अमरावती, अकोला, वाशिम, यवतमाळ, चंद्रपूर, गडचिरोली, बुलढाणामध्ये सर्वाधिक उष्णता जाणवेल. कमाल 35-38 अंश, तर किमान 20-23 अंश तापमान राहील. यावेळी उन्हाचा तडाखा तीव्र राहील. त्यामुळे नागरिकांनी योग्य ती काळजी घ्यावी.

एकंदरीत, 4 मार्चला महाराष्ट्रात उन्हाळ्याचा जोरदार चटका जाणवत आहे. नागरिकांनी भरपूर द्रवपदार्थ घ्या, सूर्यप्रकाश टाळा आणि उष्णतेच्या लक्षणांवर लक्ष ठेवा.