Weather Alert: पश्चिम महाराष्ट्रात धो धो सुरू, पुणे ते कोल्हापूर 5 जिल्ह्यांना अलर्ट, आजचा हवामान अंदाज

गेल्या काही दिवसांपासून पश्चिम महाराष्ट्रात पावसाने उघडीप दिली होती. त्यामुळे उन्हाचा चटका आणि उकाडा वाढला. मात्र, मागील 24 तासांपासून हवामानात पुन्हा बदल जाणवत आहेत. आज पुणे, कोल्हापूरसह पाचही जिल्ह्यांत जोरदार पावसाची शक्यता असून हवामान विभागाने यलो अलर्ट जारी केला आहे.

पुणे जिल्ह्यात सर्वच भागात पावसाने उघडीप घेतली आहे. मागील 24 तासात पुणे जिल्ह्यातील शिवाजीनगर परिसरात शून्य मिलीमीटर पाऊस नोंदविण्यात आला. यावेळी कमाल तापमानाचा पारा 30.4 अंश सेल्सिअस होते. पुढील 24 तासात संपूर्ण पुणे जिल्ह्यात हलक्या पावसाची शक्‍यता आहे. कमाल तापमान 30 तर किमान तापमान 23 अंश सेल्सिअस इतके राहील.

सातारा जिल्ह्यात मागील 24 तासात 0.4 मिलिमीटर पावसाची नोंद झाली. पुढील 24 तासात साताऱ्यातील कमाल तापमान 30 अंश सेल्सिअस राहिल. पुढील 4 दिवसासाठी सातारा जिल्ह्यात सतर्कतेचा येलो अलर्ट दिला आहे. यावेळी ताशी 30 ते 40 किलोमीटर वेगवान वाऱ्यासह विजांच्या कडकडाटात जोरदार पावसाची शक्यता आहे. पुढील 24 तासात देखील गडगडाटी वादळासह मध्यम पावसाची शक्यता वर्तवण्यात आली आहे.

कोल्हापूर जिल्ह्यातील हवामानात बदल जाणवत असून काही ठिकाणी तुरळक पाऊस झाला. यावेळी कमाल तापमान 29.1 अंश सेल्सिअस राहिले. आज कमाल तापमान 29 अंशावर राहण्याची शक्यता असून गडगडाटी वादळासह मध्यम पावसाची शक्यता वर्तवण्यात आली आहे. यावेळी 30 ते 40 किलोमीटर प्रतितास वेगवान वारे असेल.

सोलापूर जिल्हात मागील 24 तासात पावसाची उघडीप राहिली. तसेच 32.8 अंश सेल्सिअस कमाल तापमानाची नोंद झाली. पुढील 24 तासात कमाल तापमान 33 अंशावर जाण्याची शक्यता आहे. आज सोलापूर जिल्ह्यात गडगडाटी वादळासह मध्यम पावसाची शक्यता वर्तवण्यात आली आहे.

गेल्या 24 तासात सांगली जिल्ह्यामध्ये 3 मिलीमीटर पावसाची नोंद झाली. आज गडगडाटी वादळासह मध्यम पावसाची शक्यता हवामान विभागाने वर्तवली आहे. यावेळी जिल्ह्यातील कमाल तापमान 32 तर कमान तापमान 22 अंश सेल्सिअस इतके राहील.

दरम्यान, पश्चिम महाराष्ट्रात पावसाचा जोर पुन्हा वाढणार आहे. आजपासून पुढील काही दिवस वादळी वाऱ्यांसह पावसाचा इशारा हवामान विभागाने दिला आहे. पुढील 4 दिवस हवामानाची हीच स्थिती कायम राहणार असल्याने नागरिकांना योग्य ती काळजी घ्यावी लागेल.