Weather Alert: पश्चिम महाराष्ट्रात थंडीची लाट, साताऱ्यात पारा 11 अंश सेल्सिअस, हवामान खात्याकडून अलर्ट

उत्तरेकडील थंड वाऱ्यांचे प्रवाह असल्याने राज्याला कापरे भरले आहे. राज्यात थंडीची लाट कायम असून, पहाटे धुके आणि दव पडत आहे. आज दिनांक 17 नोव्हेंबर रोजी उत्तर महाराष्ट्र, मराठवाड्यात थंडीच्या लाटेची शक्यता असल्याने सतर्कतेचा इशारा आहे. उर्वरित राज्यातही गारठा वाढण्याचा अंदाज हवामान विभागाने दिला आहे. पश्चिम महाराष्ट्रातील हवामानाची पुढील 24 तासांत स्थिती कशी राहील पाहुयात.

पुणे जिल्ह्यात पुणे जिल्ह्यात रविवारी 28.4 कमाल आणि 10.6 अंश सेल्सिअस किमान तापमानाचा पारा नोंदविण्यात आला. आज पुणे जिल्ह्यातील कमाल तापमान 29 अंशापर्यंत राहिल. तसेच किमान तापमानाचा पारा 11 अंश सेल्सिअस राहिल.

साताऱ्यात गारठा वाढत असून धुक्यासह दव पडत आहेत. रविवारी साताऱ्यातील कमाल तापमानाचा पारा 29.7 अंशावर राहिला. तर 12.1 अंश सेल्सिअस किमान तापमान राहिले. आज सातारा जिल्ह्यात किमान आणि कमाल तापमान 11 ते कमाल 30 अंश सेल्सिअस दरम्यान स्थिर राहिल.

कोल्हापूरमध्ये देखिल गारठा वाढत असून दिवसाची सुरुवात साधारण 15 अंश सेल्सिअसच्या किमान तापमानाने होवून, जसजसा दिवस पुढे जाईल तसतसे कमाल तापमान 29 अंश सेल्सिअसवर जाण्याची शक्यता आहे. सकाळी दाट धुक्यासह पडलेल्या थंडिचा गारवा दिवसभर टिकून राहिल. दुपारी उन्हाचा चटका वाढला तरी सुर्य घसरटिला लागताच पुन्हा वातावरणातील गारठा वाढण्याची शक्यता आहे.

सोलापूर जिल्ह्यात काल रविवारी कमाल तापमान 31.2 अंश सेल्सिअसवर तर किमान तापमान 16 अंशावर राहिले. आज कमाल तापमानाचा पारा 31 अंशावर राहिल. तसेच किमान तापमानाचा पारा 13 अंशापर्यंत राहिल.

सांगली जिल्ह्यात मागील 24 तासात 13.5 अंश सेल्सिअस किमान तापमानाची नोंद झाली. आज जिल्ह्यात कमाल तापमान 30 अंशावर राहिल. तसेच किमान तापमान 15 अंशावर राहिल. सांगलीत पहाटे थंडीचा कडाका आणि दुपारी उन्हाचा चटका अशी स्थिती राहील.

पश्चिम महाराष्ट्रातील काही जिल्ह्यांत किमान तापमानात चढ-उतार होत आहेत. मात्र थंडीचा कडाका कायम राहण्याची शक्यता हवामान विभागाने वर्तविली आहे. किमान तापमानाचा पारा 10 अंशाच्या खाली घसरताच, थंडीचा कडाका वाढला आहे. तर कमाल तापमानातही हळूहळू घट होत असली तरी तुरळक ठिकाणी पारा अद्यापही तिजीपार आहे. पहाटे जाणवणारी हुडहुडी सकाळी उशिरापर्यंत टिकून राहत आहे.