Weather Alert: पुन्हा मुसळधार! पुणे ते कोल्हापूर 24 तासांत हवापालट, 20 जूनचा हवामान अंदाज

राज्यात दोन दिवसांच्या विश्रांतीनंतर पुन्हा मान्सूनचा जोर वाढला आहे. कोकण, मध्य महाराष्ट्रसह विदर्भात जोरदार पाऊस सुरू आहे. तसेच कोकण आणि घाटमाथ्यावर पावसाची संततधार कायम आहे. आज पश्चिम महाराष्ट्रातील काही भागात पुन्हा पावसाचा जोर वाढण्याची शक्यता आहे.

साताऱ्यातील कोयना धरण पाणलोट क्षेत्रात पावसाचा जोर वाढला आहे. कोयनानगर येथे 133 मिलिमीटर, नवजाला 158 मिलिमीटर आणि महाबळेशवरला 153 मिलिमीटर पावसाची नोंद झाली. तसेच सातारा शहरात 9 मिलीमीटर पाऊस नोंदविण्यात आला. पुढील 24 सातारा जिल्ह्यात ढगाळ आकाशासह हलका पाऊस असेल. मात्र सातारा घाटमाथ्यावर जोरदार पावसाची शक्यता कायम आहे.

पुणे जिल्ह्यातील आंबेगाव येथे सर्वाधिक 195 तर येथे लोणावळा येथे 160 मिलिमीटर पावसाची नोंद झाली. पुणे घाटमाथ्यावर जोरदार पावसाची शक्यता असल्याने सतर्कतेचा ऑरेंज अलर्ट देण्यात आला आहे. गुरुवारी आळंदी परिसरात पावसामुळे इंद्रायणी तुडूंब वाहू लागली. त्यामुळे संत ज्ञानेश्वर माऊलींच्या पालखी प्रस्थाना दिवशीच इंद्रायणी स्नान बंद ठेवावे लागले.

गेल्या 24 तासात कोल्हापूर परिसरात 7 मिलीमीटर पावसाची नोंद झाली. आज कोल्हापूरच्या घाटमाथ्यावर जोरदार पावसाची शक्यता आहे. यावेळी कमाल तापमान 30 अंश सेल्सिअस तर किमान तापमान 22 अंश सेल्सिअस वर असेल.

सांगली जिल्ह्यात गेल्या 24 तासात 3 मिलिमीटर पावसाची नोंद झाली. पुढील 24 तासात सांगली जिल्ह्यात हलक्या पावसाचा अंदाज आहे. यावेळी जिल्ह्यातील कमाल तापमान 31 तर किमान तापमान 23 अंश सेल्सिअस इतके राहील.

सोलापूर जिल्ह्यात कमाल तापमान 32.9 अंशावर राहिले. तसेच 0.5 मिलिमीटर पावसाची नोंद झाली. पुढील 24 तासात सोलापूर जिल्ह्यातील कमाल तापमान 35 अंशावर राहील. ढगाळ आकाशासह हलक्या पावसाचा अंदाज भारतीय हवामान विभागाने वर्तवला आहे.

दरम्यान, पश्चिम महाराष्ट्रातील सर्वच जिल्ह्यांत कमी-अधिक पाऊस सुरू आहे. काही ठिकाणी हलक्या सरी तर घाट भागात मुसळधार पाऊस सुरू आहे. त्यामुळे नागरिकांना योग्य ती काळजी घ्यावी लागणार आहे.