पश्चिम महाराष्ट्रात पाऊस सुरूच! पुण्यासह या जिल्ह्यांना हवामान विभागाचा इशारा

राज्यात गेल्या काही काळात परतीच्या जोरदार हजेरी लावली. आता ऑक्टोबर महिना सुरू झाला असून उष्णता वाढत आहे. अशातच पश्चिम महाराष्ट्रातील काही ठिकाणी पुन्हा पावसाची शक्यता वर्तवण्यात आलीये.

पुणे व आजू बाजूच्या परिसरात आकाश ढगाळ राहणार आहे. तर अधून मधून पावसाची शक्यता आहे. पुण्यातील घाट विभागात काही तुरळक ठिकाणी हलका ते मध्यम पावसाचा अंदाज आहे. आज पुण्यात 25 अंश कमाल तर 20 अंश सेल्सिअस किमान तापमान असेल.

सातारा जिल्ह्यातील अनेक भागात आज पावसाची शक्यता वर्तवण्यात आली आहे. पश्चिमेकडील पाटण, महाबळेश्वर, जावळी, सातारा, कऱ्हाड, वाई तालुक्यांत अनेक ठिकाणी जोरदार पावसाची शक्यता आहे. साताऱ्यात आज 28 अंश कमाल तर 23 अंश सेल्सिअस किमान तापमान असेल.

सांगली जिल्ह्यात पावसाची उघडझाप सुरू असून अधूनमधून मोठ्या सरी येत आहेत. मात्र पावसाचा जोर वाढण्याची शक्यता आहे. सांगली जिल्ह्यात आज 27 अंश कमाल तर 20 अंश सेल्सिअस किमान तापमान असेल.

कोल्हापूर, इचलकरंजीसह जिल्ह्याच्या अनेक भागात आज सायंकाळी पावसाचा अंदाज आहे. तर काही भागात वादळी वारा, विजेच्या कडकडाटासह पावसाची शक्यता आहे. कोल्हापूर मध्ये आज 26 अंश कमाल तर 22 अंश सेल्सिअस किमान तापमान असेल.

सोलापूर शहर व जिल्ह्यात आज चांगला पाऊस होईल. करमाळा, पंढरपूर, मोहोळ, माढा, सांगोला आदी तालुक्यांमध्ये पावसाचा जोर वाढेल, अशी शक्यता हवामान विभागाने वर्तवली आहे. सोलापूर मध्ये आज 25 कमाल तर 20 अंश किमान तापमान असेल.

दरम्यान, राज्यात ऑक्टोबर हिटमुळे तापमानात वाढ होत आहे. पश्चिम महाराष्ट्रातही उन्हाची तीव्रता वाढत असली तरी काही ठिकाणी पावसाचा अंदाज आहे. त्यामुळे नागरिकांना योग्य ती काळजी घ्यावी लागणार आहे.