Weather Alert: वादळी पाऊस अन् गारपीट होणार, दुपारनंतर मोठं संकट, सोलापूरसह 4 जिल्ह्यांना अलर्ट

उन्हाच्या झळांनी होरपळणाऱ्या पश्चिम महाराष्ट्रावर आता आणखी एक संकट घोंघावत आहे. आज 27 एप्रिल रोजी कोल्हापूर, सातारा, सांगली, सोलापूर या जिल्ह्यांत वादळी वाऱ्यासह पावसाची शक्यता असून हवामान विभागाने यलो अलर्ट दिला आहे. गेल्या 24 तासात पश्चिम महाराष्ट्रातील सरासरी तापमानात अंशत: घट झाली आहे.

सोलापूर जिल्ह्यात मागील 24 तासात कमाल तापमान 42.1 अंश सेल्सिअस तर किमान तापमान 25.6 अंश सेल्सिअस इतके होते. पुढील 24 तासांसाठी सोलापूर जिल्ह्याला वादळी वाऱ्यासह गडगडाटी पावसाचा यलो अलर्ट देण्यात आला आहे. आज कमाल तापमान 42 अंशांवर तर किमान 27 अंशांवर राहील.

कोल्हापूर जिल्ह्यामध्ये तुरळक ठिकाणी वादळी पावसाने हजेरी लावली. कोल्हापुरातील पारा 32 अंशापर्यंत उतरला असून पुढील 24 तासात कोल्हापुरातील पारा उतरलेला राहू शकतो. कमाल 35 अंश सेल्सिअस तर किमान तापमान 23 अंश सेल्सिअस इतके राहील. तसेच वादळी वाऱ्यासह तुरळक ठिकाणी पावसाचा यलो अलर्ट हवामान विभागाकडून देण्यात आला आहे.

सातारा जिल्ह्यातील पारा पुढील 24 तासात स्थिर राहील. कमाल तापमान 40 अंश सेल्सिअस तर किमान तापमान 24 अंश सेल्सिअस राहण्याचा अंदाज हवामान विभागाने वर्तवला आहे. आकाश अंशतः ढगाळ राहून तूरळक ठिकाणी वादळी वाऱ्यासह पाऊस आणि विजांच्या गडगडाटाचा अंदाज हवामान विभागाकडून वर्तवण्यात आला आहे. खटाव तालुक्यातील मायणी परिसरास गारांनी झोडपून काढले.

सांगली जिल्ह्यांत तुरळक ठिकाणी वादळी वाऱ्याने हजेरी लावली. पुढील 24 तासात सांगली जिल्ह्यातील कमाल तापमान 36 अंश सेल्सिअस तर किमान तापमान 24 अंश सेल्सिअस राहिल. जिल्ह्यात आकाश अंशतः ढगाळ राहून गडगडाटी वादळासह पावसाची शक्यता आहे.

पुणे जिल्ह्यात देखील उष्णतेचा चटका कायम असून मागील 24 तासात 40.2 अंश सेल्सिअस कमाल तापमानाची नोंद झाली. तर पुढील 24 तासात पुण्यातील पारा 40 अंशांवर जाण्याचा अंदाज हवामान विभागाने दिला आहे. पुण्यातील आकाश मुख्यता निरभ्र राहील.

दरम्यान, विदर्भातील ब्रह्मपुरी येथे देशातील उच्चांकी 45.5 अंश सेल्सिअस तापमानाची नोंद झाली. पश्चिम महाराष्ट्रातील सोलापुरात सर्वाधिक तापमान नोंदवलं गेलं. आज मात्र, सांगली, सातारा, कोल्हापूर, सोलापूर या जिल्ह्यांमध्ये वादळी वारे आणि तुरळक ठिकाणी पावसाची शक्यता असून पुण्यात निरभ्र आकाशासह उन्हाचे चटके कायम आहेत.