Weather Alert: पश्चिम महाराष्ट्रात अचानक बदलली हवा, 72 तास पावसाचे, पुण्यासह 5 जिल्ह्यांना अलर्ट

राज्यातील हवामानात पुन्हा मोठे बदल जाणवत असून पाऊस सक्रीय झाला आहे. हवामान विभागाने पुढील पाच दिवस राज्यातील अनेक भागात पावसाचा अंदाज वर्तवला आहे. त्यातही विदर्भ, दक्षिण मराठवाडा आणि पश्चिम महाराष्ट्रात पावसाचा जोर अधिक राहण्याची शक्यता आहे. आज 13 सप्टेंबर रोजी पश्चिम महाराष्ट्रातील हवामान अंदाज जाणून घेऊ.

पुणे जिल्ह्यातील शिवाजीनगर परिसरात मागील 24 तासात शून्य मिलिमीटर पावसाची नोंद झाली. तसेच कमाल तापमानाचा पारा 28.4 अंश सेल्सिअस इतका वाढला. आज पुणे जिल्ह्यात आकाश अंशतः ढगाळ राहिल. यावेळी कमाल तापमानाचा पारा 29 अंशापर्यंत राहिल. तसेच पुणे जिल्ह्यात विजांसह पावसाची शक्यता असल्याने सतर्कतेचा यलो अलर्ट दिला आहे.

कोल्हापूर जिल्ह्यात हवामानात मोठे बदल जाणवत आहेत. गेल्या 24 तासात पाऊस पुन्हा सक्रीय झाला आहे. कमाल तापमान 30 अंश सेल्सिअसपर्यंत वाढले असून आज तापामानाचा पारा 29 अंशांवर राहील. तसेच कोल्हापूर जिल्ह्यात गडगडाटी वादळासह मध्यम पावसाचा अलर्ट हवामान विभागाने दिला आहे.

गेल्या 24 तासात सांगली जिल्ह्यातील काही भागात हलका पाऊस झाला. आज विजांच्या कडकडाटासह जोरदार पावसाचा अंदाज असून हवामान विभागाने यलो अलर्ट जारी केला आहे. यावेळी जिल्ह्यातील कमाल तापमान 30 तर किमान तापमान 22 अंश सेल्सिअस इतके राहील.

सातारा जिल्ह्यात देखील पाऊस पुन्हा सक्रीय झाला असून ढगाळ हवामान राहणार आहे. पुढील 24 तासात काही ठिकाणी जोरदार पावसाची शक्यता आहे. हवामान विभागाने आज यलो अलर्ट जारी केला असून विजा आणि ढगांच्या गडगडाटात पाऊस होईल.

गेल्या काही दिवसांत सोलापूरच्या तापमानात मोठी वाढ झाली होती. पारा चौतीशीपार गेला होता. आता मात्र तापमानात घट झाली असून आज 29.4 अंशांपर्यंत तापमान राहील. वातावरण ढगाळ राहणार असून आज जोरदार पावसाची शक्यता आहे. हवामान विभागाने पुढील 24 तासांसाठी यलो अलर्ट जारी केला आहे.

राज्यातील हवामानात मोठे बदल जाणवत असून पश्चिम महाराष्ट्रात पावसाचा जोर वाढला आहे. पुढील काही दिवस हवामानाची हीच स्थिती कायम राहील. आज पश्चिम महाराष्ट्रातील पाचही जिल्ह्यांना विजांसह पावसाचा यलो अलर्ट देण्यात आला आहे. त्यामुळे नागरिकांना योग्य ती काळजी घ्यावी लागेल.