Weather Alert: गारपीट अन् वादळी पाऊस झोडपणार, दुपारनंतर पुन्हा संकट, सांगली, सोलापूरला अलर्ट

सूर्य आग ओकत असल्याने महाराष्ट्रतील अनेक भाग उष्णतेने होरपळत आहेत. मागील 24 तासात पश्चिम महाराष्ट्रातील सरासरी तापमान 20.0 ते 43.8 अंश सेल्सिअस दरम्यान राहीले होते. सोलापूर जिल्ह्यात पारा 43 अंशांवर असून उष्णतेच्या लाटेचा सामना करावा लागत आहे. पुढील 24 तासात पश्चिम महाराष्ट्रातील हवामान स्थितीबाबत अंदाज जाणून घेऊ.

सोलापूर जिल्ह्यात मागील 24 तासात कमाल तापमान 43.8 अंश सेल्सिअस इतके होते. पुढील 24 तासांसाठी सोलापूर जिल्ह्याला उष्ण लाटेचा इशारा देण्यात आला आहे. यावेळी सोलापूर जिल्ह्यातील कमाल तापमान 44 अंशांवर तर किमान तापमान 25 अंशांवर असल्याचा अंदाज हवामान विभागाने दिला आहे. तसेच दुपारनंतर गडगडाटी वादळासह पावसाची शक्यता हवामान विभागाने वर्तविली आहे.

कोल्हापूर जिल्ह्यामध्ये वादळी पावसाने हजेरी लावली. विजांच्या कडकडाटासह जिल्ह्यात काही ठिकाणी जोरदार पाऊस झाला. पावसामुळे उकाड्याने त्रासलेल्या नागरिकांना तात्पुरता गारवा मिळाला आहे. पुढील 24 तासात कोल्हापुरातील कमाल तापमान 39 अंश सेल्सिअस तर किमान तापमान 23 अंश सेल्सिअस इतके राहील.

सातारा जिल्ह्यातील पारा 41 अंशांवर असून पुढील 24 तासात साताऱ्यातील तापमान स्थिर राहील. साताऱ्यातील कमाल तापमान 41 अंश सेल्सिअस तर किमान तापमान 25 अंश सेल्सिअस राहण्याचा अंदाज हवामान विभागाने वर्तवला आहे.

सांगली जिल्ह्यांत तुरळक ठिकाणी वादळी पावसाने हजेरी लावली. तुरळक ठिकाणी गारपिटीची नोंद झाली. सांगलीतील कसबेडिग्रज, जत येथे प्रत्येकी 10 मिलिमीटर पावसाची नोंद झाली. पुढील 24 तासात सांगली जिल्ह्यातील कमाल तापमान 42 अंश सेल्सिअस तर किमान तापमान 23 अंश सेल्सिअस राहिल. जिल्ह्यात दुपारनंतर विजांच्या गडगडाटासह पावसाचा अंदाज हवामान विभागाने दिला आहे.

पुणे जिल्ह्यात देखील उष्णतेचा चटका कायम असून मागील 24 तासात 41.2 अंश सेल्सिअस कमाल तापमानाची नोंद झाली. तर पुढील 24 तासात पुण्यातील पारा 40 अंशांवर जाण्याचा अंदाज हवामान विभागाने दिला आहे. पुण्यातील आकाश मुख्यता आणि निरभ्र राहील.

पश्चिम महाराष्ट्रात हवामानाचं दुहेरी संकट घोंघावत आहे. उन्हाचा तडाखा वाढलेला असतानाच अवकाळी पाऊस झोडपतोय. त्यामुळे नागरिकांनी योग्य ती काळजी घेण्याची गरज आहे.