आजचं हवामान : सोलापुरात पारा पुन्हा चढला, पुण्यात काय स्थिती? पाहा हवामान अंदाज

राज्यातील हवामानात सातत्याने बदल होत आहेत. आता एप्रिलच्या दुसऱ्या आठवड्यात हवापालट होत असून उष्णतेचा चटका पुन्हा वाढणार आहे. राज्याच्या कमाल तापमान वाढत आहे. तापमानाचा पारा 38 अंशावर पोहचला आहे.

अवकाळी पावसाने विश्रांती घेताच राज्यात तापमानाच्या पाऱ्याने पुन्हा उसळी घेतली आहे. सूर्य तळपल्याने अनेक ठिकाणी 40 अंशांपेक्षा अधिक तापमानाची नोंद झाली आहे. आज दिनांक 7 एप्रिल रोजी कोकणात उष्ण व दमट हवामानाची शक्यता असल्याने येलो अलर्ट देण्यात आला आहे. राज्यात उन्हाचा चटका वाढण्याचा अंदाज हवामान विभागाने वर्तविला आहे. पश्चिम महाराष्ट्रातील पुढील 24 तासातील हवामान आणि तापमान स्थितीबाबत जाणून घेऊ.

पुण्यातील तापमानात वाढ होत असून आज 7 एप्रिल रोजी कमाल तापमान 39 तर किमान तापमान 19 अंश सेल्सिअस राहिल.

सातारा जिल्ह्यातील बहुतांश परिसरास आज किमान तापमान 38 तर कमाल 22 अंश सेल्सिअस इतके राहील. पुढील एक आठवडाभर सातारा जिल्ह्यातील तापमान वाढत राहणार असल्याचा अंदाज हवामान विभागाने दिला आहे.

सोलापूर जिल्ह्यातील तापमान 40 अंशावर पोहचले आहे. आज कमाल तापमान 40 अंश सेल्सिअस तर किमान तापमान 24 अंश सेल्सिअस इतके राहील.

आज सांगली जिल्ह्यातील कमाल तापमान 39 तर किमान 24 अंश सेल्सिअस इतके राहील. तापमानात वाढ होऊ लागल्याने झळा वाढल्या आहेत, तर उकाड्यातील वाढ कायम आहे.

कोल्हापूर जिल्ह्यातील कमाल तापमान 38 अंश तर किमान तापमान 23 अंश सेल्सिअस इतके राहील. दक्षिण अंतर्गत कर्नाटक आणि परिसरावर चक्राकार वारे वाहत असून, मराठवाड्यापासून दक्षिण तमिळनाडूपर्यंत हवेचा दक्षिणोत्तर कमी दाबाचा पट्टा सक्रिय आहे. यामुळे अरबी समुद्र आणि बंगालच्या उपसागरावरील बाष्पयुक्त वाऱ्यांचा संगम होत असल्याने राज्यासह दक्षिण भारतात ढगाळ हवामान आहे.