Weather Alert: पश्चिम महाराष्ट्रात वादळी पाऊस, हवामान विभागाने दिला 4 जिल्ह्यांना धोक्याचा इशारा

कोकणासह पश्चिम महाराष्ट्रात पावसाच्या हलक्या ते मध्यम सरी कोसळत आहेत. मात्र विदर्भ आणि मराठवाड्यात तापमान चाळीशीपार पोहचले आहे.

आज दिनांक 9 जून रोजी राज्यातील काही भागांसह पश्चिम महाराष्ट्रातील पुणे, सातारा, सांगली आणि सोलापूर परिसरामध्ये वादळी वाऱ्यासह पावसाचा अंदाज असल्याने सतर्कतेचा यलो अलर्ट देण्यात आला आहे.

पुणे जिल्ह्यात मागील 24 तासात 32.2 अंश सेल्सिअस कमाल तापमानाची नोंद झाली. तसेच शिवाजीनगर परिसरात 5 मिलीमीटर पाऊस नोंदविण्यात आला. पुढील 24 तासात कमाल तापमान 32 अंशावर राहिल. वादळासह मध्यम पावसाची शक्यता हवामान विभागाने वर्तवली आहे. पुणे परिसरात वादळी वाऱ्यासह पावसाचा अंदाज असल्याने सतर्कतेचा यलो अलर्ट देण्यात आला आहे.

कोल्हापुरातील कमाल तापमान 32.1 अंशांवर राहिले आहे. पुढील 24 तासात कोल्हापुरातील कमाल तापमान 32 अंशावर स्थिर राहील. पुढील 24 तासात साधारणपणे ढगाळ आकाशासह हलक्या पावसाची शक्यता आहे. पुढील 24 तासात सातारा जिल्ह्यातील कमाल तापमान 33 अंश सेल्सिअस राहिल. गेल्या 48 तासात कोसळलेल्या 42.2 मिलीमीटर मुसळधारेनंतर साताऱ्यातील पावसाने काल विश्रांती घेतली.

पुढील 24 तासात मात्र सातारा जिल्ह्यात वादळी वाऱ्यासह पावसाची शक्यता असल्याने सतर्कतेचा यलो अलर्ट देण्यात आला आहे. मागील 24 तासात सांगली जिल्ह्यातील कमाल तापमान 33 अंशवर राहिले. तसेच 3.4 मिलीमीटर पावसाची नोंद झाली. पुढील 24 तासात सांगली जिल्ह्यात ताशी 30 ते 40 किलोमीटर वादळी वाऱ्यासह पावसाची शक्यता आहे.

गडगडाटी पावसाची शक्यता असल्याने सतर्कतेचा यलो अलर्ट हवामान विभागाकडून वर्तवण्यात आला आहे. पुढील 24 तासात सोलापूर जिल्ह्यातील कमाल तापमान 36 अंशावर पोहचले आहे. आकाश ढगाळ होऊन वादळी वाऱ्यासह मध्यम पावसाचा येलो अलर्ट भारतीय हवामान विभागाने दिला आहे.

पश्चिमेकडून वाहणाऱ्या वाऱ्यामुळे महाराष्ट्राच्या मध्य भागात हवेचा कमी दाबाचा पट्टा सक्रिय आहे. यामुळे काही ठिकाण कमाल तापमान वकढते आहे. तर काही ठिकाणी वादळी वाऱ्यासह पाऊस बरसतो आहे.