हनुमान जयंतीला न चुकता 'या' पदार्थांचा करा नैवेद्य, घरात नांदेल सुख-समृद्धी; बजरंगबलीच्या कृपेने सर्व कष्ट होतील दूर!

उद्या देशभरात 'हनुमान जयंती' अत्यंत भक्तीभावाने साजरी केली जाणार आहे. रामभक्त हनुमानाला कलियुगातील जागृत दैवत मानले जाते. ज्योतिषशास्त्रानुसार, या दिवशी मारुतीरायाला त्यांच्या प्रिय वस्तूंचा नैवेद्य अर्पण केल्याने जीवनातील सर्व संकटे दूर होतात आणि सुख-समृद्धी लाभते.

बुंदी किंवा बुंदीचे लाडू: हनुमानाला बुंदी अत्यंत प्रिय आहे. बुंदीचा रंग मंगळ ग्रहाशी संबंधित आहे. हनुमान जयंतीला पिवळ्या किंवा लाल रंगाच्या बुंदीचा प्रसाद वाटल्याने कुंडलीतील 'मंगळ दोष' कमी होतो. जर तुमच्या कार्यात वारंवार अडथळे येत असतील, तर बुंदीचा भोग लावल्याने सर्व मार्ग मोकळे होतात.

बेसनाचे लाडू: शुद्ध तुपात बनवलेले बेसनाचे लाडू हनुमानाला अर्पण करणे अत्यंत शुभ मानले जाते. बेसन हे गुरु ग्रहाचे प्रतीक आहे आणि हनुमान हे ज्ञानाचे सागर आहेत. बेसनाच्या लाडूंचा नैवेद्य दाखवल्याने बुद्धिमत्ता वाढते आणि आर्थिक अडचणींतून मार्ग सापडतो.

तुळशीची माळ आणि पाने: हनुमानाला कोणताही नैवेद्य दाखवताना त्यात तुळशीचे पान असणे अनिवार्य आहे. तुळशीशिवाय मारुती भोग स्वीकारत नाहीत, अशी मान्यता आहे. या दिवशी हनुमानाला तुळशीच्या पानांची माळ अर्पण केल्याने घरातील नकारात्मक ऊर्जा नष्ट होते आणि मानसिक शांती लाभते.

बनारसी विडा: संकटातून मुक्ती मिळवण्यासाठी हनुमानाला गोड विडा अर्पण करावा. यामध्ये गुलकंद, बडीशेप आणि खोबरे असावे. हा विडा अर्पण केल्याने जीवनातील कठीण प्रसंगांवर मात करण्याचे बळ मिळते आणि अडकलेली कामे पूर्ण होतात.

केशरी भात आणि केळी: दक्षिण भारतात हनुमानाला केशरी भाताचा भोग लावण्याची परंपरा आहे. तसेच, मारुतीला केळी हे फळ अत्यंत प्रिय आहे. या वस्तूंचा नैवेद्य दाखवल्याने आरोग्याच्या तक्रारी दूर होतात आणि दीर्घायुष्य लाभते. गरिबांना या दिवशी केळी दान करणे विशेष फलदायी ठरते. टीप : (वरील माहिती सामान्य माहितीवर आधारीत आहेत. न्यूज 18 मराठी याची पुष्टी करत नाही. आपला उद्देश तुमच्यापर्यंत माहिती पोहोचवण्याचा आहे.)