Ganesh Chaturthi 2024: घरात पूजेसाठी गणपतीची मूर्ती कशी असावी? या गोष्टी पाहून मगच करा खरेदी

आपण गणेशोत्सव उत्साहाने साजरा करतो, पण तो करताना काय काळजी घ्यायची? गणपतीची मूर्ती कशी असावी? त्याची पूजा कशी करावी याबाबत जाणून घेऊया.

7 सप्टेंबरला घरोघरी गणरायाची प्राणप्रतिष्ठा केली जाणार आहे. आपण या दिवसाची वर्षभर वाट पाहतो आणि महिनोनमहिने तयारी करतो. श्रावण महिना सुरु होताच मूर्ती विक्रेते मोठमोठे मांडव टाकून मूर्तींची मांडणी करतात. त्यातली मनासारखी मूर्ती निवडून आपण भक्तीभावाने ती घरी आणतो आणि तिची प्राणप्रतिष्ठाही करतो. गणपतीला त्याच्या आवडत्या मोदकांचा नैवेद्य दाखवतो. गणरायाच्या आगमनाने घरोघरी सुखशांती, समृद्धी नांदते.

तुम्हीही यंदा गणरायाच्या आगमनाची तयारी करत असाल तर घरच्या पूजेसाठी गणरायाची मूर्ती निवडताना काय काळजी घ्यायची, जाणून घ्या.

पूजेसाठी मूर्ती निवडताना ती शक्यतो बसलेल्या स्वरुपातील आणि शाडूच्या मातीची असावी. तिच्या डोक्यावर मुकुट असावा. गणपतीची डाव्या सोंडेची मूर्ती आणण्याचा सल्ला ज्योतिषी देतात. अशी मूर्ती घरी आणून तिची पूजा केल्यास घरात ऐश्वर्य, सुख, समृद्धी नांदते असं म्हटलं जातं.

गणपतीची शेंदरी रंगाची मूर्ती पूजणं उत्तम मानलं जातं. त्यामुळे घरातील व्यक्तींच्या आत्मविश्वासात वाढ होते आणि करिअरमध्ये त्यांची वाटचालही समाधानकारक होते. गणपतीच्या हातात मोदक असलेली मूर्ती घ्या. गणपतीचं वाहन उंदीर हाही मूर्तीबरोबर हवाच. गणपतीची मूर्ती कशी असावी, याबाबत हिंदू धर्म शास्त्रानुसार काही नियम आहेत तसे ती कशी असू नये याबाबतही नियम आहेत.

गणपतीच्या मूर्तीची सोंड उजव्या बाजूला असलेली मूर्ती घेऊ नका. उजव्या सोंडेचा गणपती हा कठोर स्वभावाचा मानला जातो. त्याची पूजाअर्चा आणि उपासना अत्यंत शिस्तीत व्हावी लागते. त्यात काही चूक होणं योग्य नाही. त्यामुळेच घरगुती पूजेसाठी अशी मूर्ती न निवडण्याचा सल्ला दिला जातो. (सूचना : येथे दिलेली माहिती धार्मिक श्रद्धेवर आधारित आहे. याला कोणताही शास्त्रीय पुरावा नाही. न्यूज 18 मराठी त्याची हमी देत नाही.)