कार्तिकी एकादशी 2025: पंढरीत एकनाथ शिंदे यांनी सपत्नीक केली विठ्ठलाची महापूजा, ZP शाळेच्या विद्यार्थ्यांनाही पूजेचा मान

कार्तिकी एकादशी निमित्त पंढरपुरात श्री विठ्ठल-रुक्मिणी मंदिरात पहाटे शासकीय महापूजा संपन्न झाली. महाराष्ट्र राज्याचे उपमुख्यमंत्री एकनाथ शिंदे व त्यांच्या पत्नी लता एकनाथ शिंदे यांनी श्री विठ्ठलाची महापूजा केली. यंदा मानाच्या वारकरी दाम्पत्यासह दोन विद्यार्थ्यांनाही महापूजेचा मान देण्यात आला.

दरवर्षी कार्तिकी एकादशीला परंपरेनुसार राज्याचे उपमुख्यमंत्री आणि मानाचे वारकरी महापूजा करतात. यंदा देखील दर्शन रांगेतून माळकरी वारकरी जोडप्याची महापूजेसाठी निवड झाली. नांदेड जिल्ह्यातील हिमायतनगर येथील पोटा गावचे वारकरी रामराव बसाजी वालेगावकर व सुशीलाबाई रामराव वालेगावकर या दाम्पत्याला महापूजेचा मान मिळाला. वालेगावकर हे गेल्या 20 वर्षांपासून पंढरीची वारी करत आहेत.

यंदा कार्तिकी एकादशीला दोन विद्यार्थ्यांना देखील महापूजेचा मान देण्यात आला. सोलापूर जिल्ह्यातील मोहोळ तालुक्यातील जिल्हा परिषद शाळांची एक विद्यार्थिनी आणि एक विद्यार्थी महापूजेत सहभागी झाला. यामध्ये पापरी येथील जिल्हा परिषद शाळेची विद्यार्थिनी मानसी आनंद माळी आणि देवडी येथील शाळेचा विद्यार्थी आर्या समाधान थोरात यांना हा मान मिळाला.

कार्तिकी एकादशीच्या महापूजेसाठी मंत्री भरत गोगावले, पालकमंत्री जयकुमार गोरे, आमदार समाधान आवताडे, अभिजीत पाटील, तानाजी सावंत, बापूसाहेब पठारे यांच्यासह जिल्हाधिकारी कुमार आशीर्वाद, मंदिर समितीचे सहअध्यक्ष गहिनीनाथ महाराज औसेकर तसेच मंदिर समितीचे कार्यकारी अधिकारी राजेंद्र शेळके उपस्थित होते.

आज कार्तिकी एकादशी निमित्त विठुरायाच्या मंदिरात आकर्षक फुलांची सजावट देखील करण्यात आली. श्री विठ्ठल आणि रुक्मिणी मातेच्या दर्शनासाठी महाराष्ट्रासह राज्याच्या कानाकोपऱ्यातून 5 लाखाहून अधिक भाविक पंढरपुरात दाखल झाले आहेत.

कार्तिकी एकादशीनिमित्त लाखोंच्या संख्येने आलेल्या भाविकांनी महासागर चंद्रभागेच्या तीरावर पवित्र स्नान करण्यासाठी पहाटेपासूनच गर्दी केली होती. राज्याचे उपमुख्यमंत्री एकनाथ शिंदे यांनी राज्यातील सर्व भाविकांना कार्तिकी एकादशी निमित्त शुभेच्छा दिल्या.

यावेळी पंढरपूरची चंद्रभागा ही वारकऱ्यांसाठी पवित्र गंगा असून ती कायमस्वरुपी प्रदूषणमुक्त करण्याचे प्रयत्न सुरू आहेत. या प्रयत्नांचा भाग म्हणून नगर विकास खात्याकडून चंद्रभागा नदीच्या प्रदुषण मुक्तीसाठी 120 कोटी रुपये निधी दिला असून यातील पहिल्या टप्प्याचं काम सुरू आहे, असे एकनाथ शिंदे यांनी सांगितले.