या वर्षातील शेवटचं सूर्ग्रहण केव्हा होणार? भारतात दिसणार का?

ज्योतिषशास्त्रात नवग्रहांना विशेष महत्त्व आहे. ग्रहांच्या स्थितीचा प्रत्येक व्यक्तीच्या जीवनावर परिणाम होतो, अशी मान्यता आहे. त्यातही सूर्य व चंद्रग्रहणाला तर ज्योतिषशास्त्रात महत्त्वाचं स्थान आहे. ग्रहणाच्या स्थितीचा अभ्यास करून त्याचे चांगले-वाईट परिणाम लक्षात घेतले जातात.

हिंदूधर्मात सूर्यग्रहणाला विशेष महत्त्व आहे. सूर्यग्रहण ही एक खगोलीय घटना आहे, ज्यामध्ये चंद्र सूर्याला पूर्णपणे किंवा अंशतः झाकतो, व पृथ्वीवरील सूर्यप्रकाश कमी होतो किंवा पूर्णपणे अदृश्य होतो. साधारणत: वर्षभरात एकच सूर्यग्रहण होतं. पण या वर्षी म्हणजेच 2024 मध्ये दुसऱ्यांदा सूर्यग्रहण होणार आहे.

या वर्षातील पहिले सूर्यग्रहण 8 एप्रिल 2024 रोजी झाले. हे सूर्यग्रहण प्रामुख्याने अमेरिका आणि आसपासच्या देशांमध्ये दिसलं होतं. भारतामध्ये मात्र हे ग्रहण दिसलं नाही. आता या वर्षी होणारं दुसरं सूर्यग्रहण भारतात दिसणार का? सूर्यग्रहण कोणत्या तारखेला होणार? असे प्रश्न अनेकांना पडले आहेत. चला तर, आज या बाबतच जाणून घेऊ.

ऑक्टोबर महिन्यात सूर्यग्रहणवर्ष 2024 मधील दुसरं सूर्यग्रहण अश्विन महिन्यातील अमावास्येला होणार आहे. इंग्रजी कॅलेंडरनुसार हे सूर्यग्रहण 2 ऑक्टोबर 2024 रोजी होईल. भारतीय वेळेनुसार हे सूर्यग्रहण रात्री 9.13 वाजता सुरू होऊन पहाटे 3.17 वाजता संपेल. ग्रहणाचा एकूण कालावधी सुमारे 6 तास 4 मिनिटे असेल.

सूर्यग्रहणाचा सुतक काळ केव्हा सुरू होईल?सूर्यग्रहणाचा काळ म्हणजे सुतक काळ असं मानलं जातं. पण हा काळ ग्रहणाच्या प्रकारावर आणि व्यक्तीच्या धार्मिक श्रद्धेवर वेगवेगळा असू शकतो. शास्त्रानुसार सुतक कालावधी सूर्यग्रहणाच्या 12 तास अगोदर सुरू होतो. जेव्हा सुतक कालावधी सुरू होतो, तेव्हा या काळात शुभकार्य करू नयेत अशी मान्यता आहे. या काळात अनेकजण पूजा करणंदेखील टाळतात. सुतक काळात मंदिरांचे दरवाजे बंद केले जातात. ग्रहण संपल्यानंतर धार्मिक विधी करून हे दरवाजे उघडले जातात.

भारतात ग्रहण दिसणार का?यंदाच्या वर्षातील दुसरे सूर्यग्रहण म्हणजेच 2 ऑक्टोबर 2024 रोजी होणारे सूर्यग्रहण ब्राझील, कुक आयलंड, चिली, पेरू, होनोलुलु, अंटार्क्टिका, अर्जेंटिना, मेक्सिको, न्यूझीलंड, आर्क्टिक, फिजी, उरुग्वे, ब्युनोस आयर्स आणि बेका आयलंड या देशांमध्ये दिसणार आहे. भारतामध्ये हे ग्रहण दिसणार नाही. कारण हे ग्रहण भारतीय वेळेनुसार रात्री होणार आहे. हे सूर्यग्रहण भारतात दिसणार नसल्यामुळे ग्रहणाचा सुतक कालावधी वैध राहणार नाही. त्यामुळे सुतक पाळायची गरज नाही. दरम्यान, ऑक्टोबर महिन्यात होणारं सूर्यग्रहण हे या वर्षातील शेवटचं सूर्यग्रहण असणार आहे. परंतु हे ग्रहण भारतामध्ये दिसणार नाही.

(सूचना : येथे दिलेली माहिती धार्मिक श्रद्धेवर आधारित आहे. याला कोणताही शास्त्रीय पुरावा नाही. न्यूज 18 मराठी त्याची हमी देत नाही.)