T20 World Cup सुरू असताना BCCI चा शॉकिंग निर्णय, कोल्हापूरच्या जावयावर सोपवली टीम इंडियाची मोठी जबाबदारी!

टी-ट्वेंटी वर्ल्ड कपमध्ये टीम इंडियाने सेमीफायलनमध्ये तर एन्ट्री मारली पण सर्वात मोठं टेन्शन ठरतंय तर ते म्हणजे टीम इंडियाची बॉलिंग... वनडे आणि टेस्टमध्ये देखील टीम इंडियाच्या बॉलिंगची पोलखोल झाली आहे.

आगामी वनडे वर्ल्ड कप आणि वर्ल्ड टेस्ट चॅम्पियनशीपसाठी टीम इंडियाला आपल्या बॉलिंग डिपार्टमेंटमध्ये कमालीची सुधारणा करण्याची गरज आहे. अशातच आता बीसीसीआयने मोठा निर्णय घेतला आहे.

भारतीय क्रिकेट नियामक मंडळाने (BCCI) देशातील फास्टर्स बॉलर्सची फळी मजबूत करण्यासाठी 2011 चा वर्ल्ड कप स्टार झहीर खानची मदत घेण्याचा निर्णय घेतला आहे.

बेंगळुरू येथील सेंटर ऑफ एक्सलन्स (CoE) मध्ये होणाऱ्या विशेष ट्रेनिंग कॅम्पसाठी कोल्हापूरचा जावई म्हणजेच झहीर खानची नियुक्ती करण्यात आली आहे. मार्चच्या पहिल्या आठवड्यात हा कॅम्प आयोजित केला जाणार आहे.

कॅम्पमध्ये विविध राज्यांतील निवडक फास्ट बॉलर्सना झहीर मार्गदर्शन करणार असल्याची माहिती सूत्रांनी दिली आहे. सेंटर ऑफ एक्सलन्समध्ये ट्रॉय कूली यांच्यानंतर सध्या फास्ट बॉलिंग कोचचे पद रिक्त होतं.

व्हीव्हीएस लक्ष्मण यांनी पुढाकार घेऊन झहीर खानला या मोहिमेत सामील करून घेतले आहे. 28 फेब्रुवारी ते 2 मार्च या कालावधीत हा महत्त्वाचा कॅम्प बेंगळुरू येथे पार पडणार आहे.

दरम्यान, झहीर खान पूर्णवेळ कोच म्हणून जबाबदारी स्वीकारणार का, हे अद्याप स्पष्ट झालेले नाही, कारण या कामासाठी त्याला कुटुंबापासून बराच काळ दूर राहावे लागेल, अशी माहिती बीसीसीआयच्या सुत्रांनी टाइम्स ऑफ इंडियाला दिली आहे.