IND vs SA 2nd T20 : सूर्याची साडेसाती संपली, टीम इंडियाने अखेर टॉस जिंकला, प्लेइंग इलेव्हनमध्ये कोण?

भारत आणि दक्षिण आफ्रिका यांच्यातल्या दुसरा टी-20 सामना चंडीगढच्या मुल्लानपूर स्टेडियममध्ये होत आहे. मुल्लानपूरमध्ये होणारा हा पहिलाच आंतरराष्ट्रीय सामना आहे, याआधी आयपीएलचे पंजाब किंग्सचे सामने या मैदानात खेळवले गेले.

दक्षिण आफ्रिकेविरुद्धच्या या सामन्यात टीम इंडियाचा कर्णधार सूर्यकुमार यादवने टॉस जिंकून पहिले बॉलिंगचा निर्णय घेतला आहे.

टी-20 वर्ल्ड कपच्या तोंडावर शुभमन गिलचा फॉर्म टीम इंडियासाठी चिंतेचा विषय आहे. मागच्या 16 आंतरराष्ट्रीय टी-20 सामन्यांमध्ये गिलला एकदाही अर्धशतक करता आलेलं नाही, त्यामुळे त्याच्यावरचा तणाव वाढला आहे. पहिल्या टी-20 मॅचमध्ये गिल 2 बॉलमध्ये 4 रन करून माघारी परतला.

दुसरीकडे टीम इंडियाचा कर्णधार सूर्यकुमार यादवनेही टेन्शन वाढवलं आहे. सूर्यकुमार यादवला मागच्या 24 टी-20 आंतरराष्ट्रीय सामन्यांमध्ये फक्त एकदाच अर्धशतक करता आलं आहे. मागच्या सामन्यात सूर्यकुमार यादव 12 रन करून आऊट झाला.

पहिल्या टी-20 सामन्यात भारताचा 101 रनने विजय झाला असला, तरीही बॅटिंमध्ये हार्दिक पांड्या वगळता कुणालाच मोठी धावसंख्या करता आली नाही. दुसरीकडे सगळ्याच बॉलरनी मात्र उत्कृष्ट कामगिरी केली, त्यामुळे या सीरिजमध्ये टीम इंडिया 1-0 ने आघाडीवर आहे.

टी-20 वर्ल्ड कपआधी टीम इंडियाचे फक्त 9 सामने शिल्लक आहेत, यातले 4 सामने दक्षिण आफ्रिकेविरुद्ध आणि उरलेले 5 सामने न्यूझीलंडविरुद्ध होणार आहेत. या 9 सामन्यांमध्ये गिल आणि सूर्यकुमार यादव फॉर्ममध्ये येणं टीम इंडियासाठी गरजेचं आहे.

भारताची प्लेइंग इलेव्हन : अभिषेक शर्मा, शुभमन गिल, सूर्यकुमार यादव (कर्णधार), तिलक वर्मा, हार्दिक पांड्या, शिवम दुबे, जितेश शर्मा, अक्षर पटेल, बुमराह, वरुण चक्रवर्ती, अर्शदीप सिंग