IND vs PAK : पाकिस्तानच्या ड्रेसिंग रूममध्ये ड्रामा, भारताविरुद्धच्या पराभवाचं खापर कुणावर फुटलं?

भारताविरुद्धच्या या पराभवानंतर पाकिस्तानवर ग्रुप स्टेजलाच घरी जायचा धोका निर्माण झाला आहे. ग्रुप ए च्या पॉईंट्स टेबलमध्ये पाकिस्तान तिसऱ्या क्रमांकावर आहे. तर टीम इंडिया पहिल्या आणि युएसए दुसऱ्या क्रमांकावर आहे.

पाकिस्तानचा ग्रुप स्टेजमधला शेवटचा सामना नामिबियाविरुद्ध आहे. या सामन्यात पाकिस्तानचा पराभव झाला तर त्यांचं आव्हान संपुष्टात येईल आणि भारत, युएसए सुपर-8 मध्ये प्रवेश करतील.

भारताविरुद्धच्या सामन्यात पाकिस्तानची बॅटिंग सपशेल अपयशी ठरली, त्यानंतर पाकिस्तानी खेळाडूंवर त्यांचेच चाहते टीकेची झोड उठवत आहेत. खेळाडूंच्या शॉट सिलेक्शनवरही पाकिस्तानच्या माजी खेळाडूंनी प्रश्नचिन्ह उपस्थित केलं आहे आणि दिग्गज खेळाडूंना टीममधून बाहेर करण्याची मागणी केली आहे.

भारताविरुद्ध झालेल्या पराभवानंतर पाकिस्तानचे मुख्य प्रशिक्षक माईक हेसन यांनी ड्रेसिंग रूममधील वातावरण कसं होतं, ते सांगितलं आहे. 'टीमचे खेळाडू निराश आहेत. ही मॅच पाकिस्तानी खेळाडूंसाठी फक्त एक मॅच नाही, तर प्रतिष्ठेचा मुद्दा असतो. असा पराभव स्वीकारणं खेळाडूंसाठी सोपं नाही', असं हेसन म्हणाले आहेत.

मागच्या काही काळापासून टीमची कामगिरी चांगली झाली आहे, तसंच टीमला भारताविरुद्धच्या विजयाबाबत आत्मविश्वासही होता, पण आमची टीम या सामन्यात दबावामध्ये वाटली, असं वक्तव्य माईक हेसन यांनी केलं आहे.

'आम्ही खूप निराश आहोत, आम्ही जेवढं चांगलं खेळायला पाहिजे होतं, तितकं चांगलं खेळलो नाही. अशा स्पर्धांमध्ये सगळं तुम्हाला पाहिजे तसं होत नाही. आमचं काम हा पराभव विसरून परत उठायचं आणि पुढच्या सामन्यात चांगली कामगिरी करायचं आहे', अशी प्रतिक्रिया हेसन यांनी दिली.

'जेव्हा एखादा खेळाडू तुम्हाला दबावात टाकतो, तेव्हा तुम्ही कशी प्रतिक्रिया देता, हा महत्त्वाचा प्रश्न असतो. हे आमच्यासमोर आव्हान असणार आहे, कारण स्पर्धा जशी पुढे जाईल, तसे आम्ही पुन्हा दबावात येऊ. आम्ही दबावात काय प्रतिक्रिया देतो, ते पाहावं लागेल, असं हेसन म्हणाले.

सगळे खेळाडू चांगले आहेत, पण दबाव येतो तेव्हा तुम्ही तुमच्या निर्णयावर विश्वास ठेवता का? यावर सगळं अवलंबून असेल. स्पर्धेत पुढे जायचं असेल, तर आम्हाला सुधारावं लागेल,' असं वक्तव्य माईक हेसननी केलं आहे.