Iran War: इराणचा 'महाप्रकोप' 'लिटील इंडिया'वर कोसळला, जीवघेण्या क्षेपणास्त्रांनी मराठमोळ्या भागात हाहाकार, इस्रायल हादरला! PHOTOs

शनिवारी इराणने दक्षिण इस्रायलवर बॅलिस्टिक क्षेपणास्त्रांचा एक मोठा हल्ला चढवला. या हल्ल्यात 'अराद' शहराचे सर्वाधिक नुकसान झाले. या हल्ल्यात लहान मुलांसह सुमारे १०० लोक जखमी झाले. याव्यतिरिक्त, इराणने 'लिटल इंडिया' म्हणून ओळखल्या जाणाऱ्या 'डिमोना' शहरावरही क्षेपणास्त्र डागलं.

इस्रायलची हवाई संरक्षण यंत्रणा इराणची क्षेपणास्त्रे रोखण्यात अपयशी ठरली. ज्यामुळे ती क्षेपणास्त्रे थेट नागरी वस्त्यांवर जाऊन आदळली. या इराणी हल्ल्याने संपूर्ण प्रदेशात प्रचंड हाहाकार माजवला. हा हल्ला खूपच भीषण होता. थरकाप उडवणारे फोटो समोर आले आहेत.

या हल्ल्याचा सर्वाधिक तीव्र परिणाम 'अराद' शहरात दिसून आला. येथे किमान ६८ लोक जखमी झाले; त्यांपैकी १० जणांची प्रकृती चिंताजनक असल्याचे सांगण्यात येत आहे, तर १४ जणांना मध्यम स्वरूपाच्या दुखापती झाल्या आहेत. उर्वरित व्यक्तींना किरकोळ दुखापती झाल्या आहेत. काही इमारतींचे मोठ्या प्रमाणावर नुकसान झाले असून, अनेक ठिकाणी आगी भडकल्या.

वृत्तांनुसार, निवासी इमारतींच्या मधोमध एक क्षेपणास्त्र आदळले. ज्यामुळे लगतच्या घरांचे नुकसान झाले आणि आग भडकली. या घटनेनंतर, त्या परिसरातील परिस्थिती पूर्णपणे बदलून गेली. इराणच्या हल्ल्यामुळे इतक्या मोठ्या प्रमाणावर झालेले नुकसान पहिल्यांदाच समोर आले.

या घटनेनंतर तात्काळ मदत आणि बचाव कार्य सुरू करण्यात आले. ढिगाऱ्याखाली अजूनही काही लोक अडकलेले असू शकतात, अशी भीती मदत आणि बचाव पथकाला आहे. इस्रायलच्या आपत्कालीन सेवा संस्था 'मागेन डेव्हिड ॲडोम'चे प्रमुख एली बिन यांनी अनेक लोक बेपत्ता असण्याचीही शक्यता वर्तवली.

या हल्ल्यानंतर, सोरोका रुग्णालयात 'सामूहिक जीवितहानीची परिस्थिती' (Mass-casualty situation) जाहीर करण्यात आली. या ठिकाणी सध्या जखमींवर उपचार सुरू आहेत. आपली हवाई संरक्षण यंत्रणा या क्षेपणास्त्रांना रोखण्यात अपयशी का ठरली, याप्रकरणी इस्रायली लष्कराने चौकशी सुरू केली आहे. लष्कराच्या एका प्रवक्त्याने सांगितले की, जरी ही यंत्रणा कार्यरत होती, तरीही ती संबंधित क्षेपणास्त्र रोखू शकली नाही. या घटनेतून पुढील काळात योग्य ती खबरदारी घेतली जाईल.

डिमोना शहरात जवळपास ३० टक्के लोकसंख्या म्हणजे सुमारे ७,५०० भारतीय वंशाचे ज्यू राहतात. यातील बहुतांशी जण जे मूळचे महाराष्ट्रातील आहेत. येथे अनेक घराघरात मराठी बोलली जाते

इराणच्या नतांझ या अणू प्रकल्पावर हल्ला केला. इराणचं आण्विक केंद्र उद्धवस्त करण्याचा प्रयत्न करण्यात आला. त्याला प्रत्युत्तर म्हणून इराणने इस्रायलच्या डिमोना शहरावर हल्ला केला. डिमोना शहरात इस्रायलचा अणू प्रकल्प आहे. इराणच्या हल्ल्यात डिमोना येथील अणू संशोधन केंद्र सुरक्षित असल्याची माहिती समोर आली आहे. (All Photos Credit- Reuters)