Christmas Santa Claus : ख्रिसमस म्हणजे येशू ख्रिस्ताचा जन्म दिन, मग या दिवशी सांताक्लॉजचा संबंध काय

ख्रिसमस म्हटलं की डोळ्यासमोर दोन गोष्टी लगेच येतात एक म्हणजे येशू ख्रिस्ताचा जन्म आणि दुसरी म्हणजे लाल कपड्यातला, हसरा सांताक्लॉज. पण अनेकांच्या मनात एक प्रश्न असतो ख्रिसमस हा येशूचा जन्मदिवस आहे, मग सांताक्लॉजचा त्याच्याशी नेमका काय संबंध?

ख्रिसमस हा ख्रिश्चन धर्मातील अत्यंत महत्त्वाचा सण आहे. हा दिवस येशू ख्रिस्ताच्या जन्माच्या स्मरणार्थ साजरा केला जातो. येशूने मानवतेला प्रेम, क्षमा, दया, त्याग आणि शांती यांचा संदेश दिला. त्यामुळे ख्रिसमस हा केवळ उत्सव नसून मानवतेच्या मूल्यांची आठवण करून देणारा दिवस आहे.

सांताक्लॉज हा बायबलमधील किंवा येशूच्या जीवनाशी थेट संबंधित व्यक्ती नाही. सांताक्लॉजची संकल्पना संत निकोलस या चौथ्या शतकातील ख्रिश्चन संतापासून उदयास आली. संत निकोलस हे गरीब, अनाथ आणि गरजू लोकांना गुपचूप मदत करणारे, विशेषतः लहान मुलांवर प्रेम करणारे संत होते. ते रात्री कुणाला न कळता भेटवस्तू देत असत, ही कथा लोकांमध्ये प्रसिद्ध झाली.

युरोपमध्ये सेंट निकोलसला सिंटरक्लास म्हणत. पुढे हेच नाव अमेरिकेत पोहोचलं आणि त्याचं सांताक्लॉज झालं. कालांतराने लाल पोशाख, पांढरी दाढी, हसरा चेहरा आणि भेटवस्तूंची पिशवी अशी सांताक्लॉजची ओळख तयार झाली.

ख्रिसमस आणि सांताक्लॉजचा संबंध धार्मिक नसून प्रतीकात्मक आणि सांस्कृतिक आहे. येशू ख्रिस्ताने दिलेला इतरांसाठी प्रेम आणि त्याग हा संदेश सांताक्लॉजच्या रूपातून सोप्या, आनंदी पद्धतीने मांडला जातो. सांताक्लॉज म्हणजे देण्याची भावना, दयाळूपणा, आनंद, मुलांच्या चेहऱ्यावर हसू. हीच मूल्ये येशूच्या शिकवणीचा गाभा आहेत. त्यामुळे सांताक्लॉज हा ख्रिसमसच्या आत्म्याचं आनंदी प्रतीक मानला जातो. ख्रिसमसचा आत्मा म्हणजे प्रेम आणि शांती आणि सांताक्लॉज म्हणजे त्या आत्म्याचं हसतं-खेळतं प्रतीक.